Corte ta permiti cambio di genero den acta di nacemento na Aruba

ORANJESTAD – Corte Comun di Husticia a determina cu un persona transgender na Aruba por cambia e indicacion di genero den su acta di nacemento for di femenino pa masculino, apesar cu Aruba ainda no tin un ley specifico cu regula e proceso aki. E caso tabata relaciona cu un hoben naci  na 2006 cu inicialmente a wordo registra como mucha muher, pero cu actualmente ta identifica su mes y ta biba como homber. E Departamento di Registro Civil a presenta apelacion contra un decision anterior di tribunal, pero Hof a confirma cu e cambio por wordo realiza.

DERECHO HUMANO TA BASA DI DECISION

Segun Corte, e derecho di un persona pa su identidad di genero wordo reconoci ta proteha bou di articulo 8 di Convenio Europeo pa Derechonan Humano, cu ta garantiza e derecho riba bida privado. Como Aruba ta forma parti di Reino Hulandes y e convenio ta aplica na Aruba, autoridadnan mester reconoci e identidad di genero di personanan transgender den cierto circunstancianan.

NO TIN LEY SPECIFICO AINDA

Corte a señala cu, diferente di Hulanda, Aruba ainda no tin un ley cu regula formalmente e cambio di genero den documentonan oficial. P’esey, te cu un ley asina wordo aproba, cada peticion mester wordo evalua individualmente door di tribunal. Den e caso aki, Corte a conclui cu tabatin suficiente evidencia cu e persona en cuestion tin un identidad masculino permanente. Entre e documentacion considera tabatin informe di psicologonan, un pediatra y begeleiding specialisa for di e equipo di genero di Centro Medico Universitario di Amsterdam. Como resultado, e cambio den acta di nacemento for di femenino pa masculino lo keda vigente.