Corte ta rechasa peticion pa placa bek riba dividendo for di Aruba

ORANJESTAD – Hoge Raad na Hulanda a determina cu un compañia matriz mericano no tin derecho pa ricibi placa bek di impuesto riba dividendo paga pa un distribucion di ganashi for di Aruba. E caso ta relaciona cu un compañia arubiano cu ta opera, entre otro, un salon di belleza, sauna y centro di masaje. Tur accion di e compañia ta den man di un compañia matriz na Merca. Ora e compañia arubiano a distribui ganashi na su propietario mericano na 2017, e la retene 10% di impuesto riba dividendo, conforme cu ley fiscal di Aruba. Posteriormente, e compañia mericano a solicita pago bek placa di e impuesto, alegando cu un tratado di amistad entre Hulanda y Merca di 1956 no permiti trato menos favorable na empresanan mericano compara cu empresanan similar na Aruba.

CORTE NO TA DI ACUERDO

Corte, sin embargo, no a sigui e argumento ey. Segun e maximo tribunal, e compañia matriz na Merca no ta ehecuta actividadnan comercial directamente na Aruba. E trabounan y operacionnan na Aruba ta wordo realiza door di e compañia local. E hecho cu e propietario mericano tin influencia riba maneho di e empresa arubiano no ta nifica cu e compañia matriz mes ta haci negocio na Aruba. P’esey, Corte a conclui cu e compañia mericano no por invoca e disposicion di tratado riba cual el tabata basa su peticion.

IMPUESTO TA KEDA VIGENTE

Cu e decision aki, e retencion di 10% riba dividendo ta keda na vigor y no lo wordo devolvi. E sentencia no ta nifica cu empresanan mericano nunca por beneficia di extencion of devolucion di impuesto riba dividendo na Aruba. Segun Corte, e fayo lo ta aplica  specificamente na e caso aki, unda e compañia matriz no tabatin actividadnan comercial propio na Aruba.