Embahada hulandes ta alerta pa posible caos na Houston despues di partido di Hulanda

HOUSTON – Embahada Hulandes na Merca diasabra atardi a alerta ciudadanonan hulandes na Merca, specificamente Houston di posibel problema. Diasabra atardi, e mensahe tabata cu autoridadnan den Houston a emiti un advertencia pa ciudadano hulandesnan cu ta den e ciudad despues di informacion cu ta circula riba social media tocante un posible reunion ilegal, conoci como un “Take Over”, cu por tuma lugar den centro di Houston durante anochi di diasabra, 20 di juni 2026. Segun e advertencia, diferente mensahe riba rednan social ta yama hobenan pa participa den e actividad. E tipo di reunionnan ilegal aki ta ocurri regularmente den Merca y frecuentemente ta resulta den pelea, vandalismo y otro situacionnan inseguro.

SIMPATISANTENAN HULANDES NA MERCA

E alerta ta particularmente relevante pa miles di simpatisante hulandes cu ta den Houston pa sigui e partido di Copa Mundial entre Hulanda y Suecia. Autoridadnan ta recomenda pa hende keda extra alerta den Downtown Houston, especialmente despues di e partido y durante e oranan mas laat di anochi.

RECOMENDACION

Entre e recomendacionnan principal ta evita grupo grandi di hobenan, laga cualkier lugar inmediatamente si e atmosfera ta bira tenso of amenazante, y tene cuenta cu por tin camindanan sera, congestion di trafico y un presencia policial mas grandi cu normal. Autoridadnan tambe ta aconseha bishitantenan pa sigui reportahenan di medio local y obedeci tur indicacionnan oficial cu ta wordo emiti durante anochi.

Pa esnan cu tin pregunta tocante e situacion actual, ta recomenda pa tuma contacto cu autoridadnan local, e hotel unda nan ta hospeda of nan organizacion di biahe.

Gobierno Hulandes a informa cu e embahada ta disponible 24 ora pa dia pa brinda asistencia na ciudadano hulandesnan cu por haña nan mes den dificultad. Asistencia por wordo obteni via NederlandWereldwijd na +31 247 247 247 of via WhatsApp na +31 857 737 400.

E advertencia ta bin na un momento cu miles di fanaticonan internacional ta den Houston pa e torneo mundial, loke ta aumenta e importancia di sigui medidanan di seguridad y evita situacionnan cu por pone seguridad personal na riesgo.