Fiscal ta exigi 13 aña di prison pa I. Paesch pa asesinato di su primo Rene

ORANJESTAD – Ministerio Publico a exigi 13 aña di prison contra I.Paesch (40), acusa di a tira mata su primo Rene Paesch na 23 di augustus 2025 na Coba Lodo. E exigencia a wordo presenta awe den Corte di Husticia durante un audiencia largo caminda a trata e circunstancianan cu a conduci na e tiramento fatal ampliamente.

CONFLICTO DI VARIOS AÑA

Segun Fiscal, e investigacion a mustra cu I. y Rene tabatin un conflicto cu a dura varios aña, relaciona cu un asalto arma y disputanan financiero cu datan for di 2018. Ministerio Publico ta di opinion cu I. a busca confrontacion cu R. y a provoca e situacion cu finalmente a resulta den e muerte di su primo.

INCIDENTE NA LEKKER BAR

Fiscal a argumenta cu despues di un incidente na Lekker Bar durante e madruga di 23 di augustus 2025, I. a busca su arma di candela y despues a enfrenta Rene. Grabacionnan di camera di seguridad, testimonio di testigonan y evidencia forense, segun Ministerio Publico, ta apunta cu I. a actua intencionalmente.

A TIRA RENE 3 BIAHA Y GOLPEA 

Durante e audiencia a sali na cla cu Rene a sufri tres herida di bala, incluyendo dos den pecho. Investigacion forense tambe a indica cu e victima a wordo golpia na cabez cu e pistool mientras ainda tabata na bida. Rene finalmente a perde su bida door di hemoragia interno. I. a declara cu el a actua for di miedo, alegando cu Rene tabata menaza constantemente y cu el a pensa cu su bida tabata den peligro. 

DEFENSA PROPIO

E la sostene cu durante e confrontacion final el a kere cu Rene tabata arma y cu e no tabata tin otro opcion cu defende su mes. Sinembargo, Fiscal a rechasa e argumento di defensa propio. Segun Ministerio Publico, I. tabatin diferente alternativa, incluyendo huy, busca ayudo of yama Polis. Na bes di esey, el a scoge pa tira varios disparo den direccion di Rene.

PARCIALMENTE MENOS RESPONSABEL

Raportnan di un psychiater y psycologo presenta den corte ta mustra cu I. ta parcialmente menos responsabel pa su actonan door di problema mental y uso di alcohol y marihuana. A pesar di esey, e expertonan a conclui cu el por wordo considera criminalmente responsabel.

COCAINA NA CAS 

Ademas di e caso di homicidio, Polis tambe a haya 465 gram di cocaina den un apartamento na e propiedad unda I. ta biba. E la nenga cu e droga tabata di dje, pero Fiscal a bisa cu e splicacion presenta no ta creibel.

DEMANDA DI COMPENSACION PA VICTIMA

Familia di e victima a presenta un demanda civil pa compensacion financiero relaciona cu gastonan di entierro, daño emocional y gastonan legal.

Despues di a scucha e defensa, Corte a anuncia cu sentencia lo wordo dicta riba 10 di juli 2026.