Aruba den medio di pelea verbal den Parlamento Albanes

TIRANA, Albania – Aruba a bira tema di discusion durante un fuerte debate politico den Parlamento di Albania, despues cu dos di e politico mas conoci di e pais, Damian Gjiknuri y Sali Berisha, a intercambia acusacionnan publica. Pa hopi lector, e referencia na Aruba por parce confuso. Loke ta cla ta cu e dos politico ta referi na un supuesto asunto of investigacion cu, segun nan, tin relacion cu Aruba. Sinembargo, durante e debate no a duna detaye concreto tocante exactamente kiko a pasa na Aruba of con ta conecta cu e asunto politico. Damian Gjiknuri, miembro di partido gobernante, a declara cu ora “e berdad tocante Aruba” sali na cla, e lo revela mas informacion. Segun  e, Berisha mester splica cu e pueblo albanes cierto acuerdo cu, segun su alegacion, a permiti Berisha pa bishita Merca atrobe. Berisha, kende ta lider di oposicion, a rechasa tur acusacion y a insisti cu e alegacionnan contra dje ta fabrica. E la reta Gjiknuri pa haci publica e documentonan of dosiernan relevante si realmente tin prueba contra dje.

CONMOCION DEN PARLAMENTO

E intercambio verbal a causa bastante conmocion den Parlamento y den medionan di comunicacion albanes. Te ainda no ta cla exactamente kico e referencia repetitivo na Aruba ta significa ni cua  ta e rol preciso di e isla den e asunto. Loke si ta evidente ta cu Aruba a wordo menciona varios biaha den un debate politico caluroso entre dos figura importante di politica albanes, algo cu a desperta curiosidad tanto den Albania como pa esnan cu a tende e declaracionnan. Te cu mas informacion oficial sali na cla, e relacion exacto entre Aruba y e controversia politico aki ta keda incierto.