Turismo a impulsa economia di Corsou cu crecemento di 5,1% na 2025

WILLEMSTAD – Economia di Corsou a registra un crecemento di 5,1% durante 2025, compara cu aña anterior. Segun cifranan preliminar di Oficina Central di Statistica (CBS), e crecimiento tabata principalmente gracias na turismo y e actividadnan economico cu ta resulta di dje.

E sector cu a crece mas, tabata acomodacion y restaurant, cu un aumento di casi 11%. Tambe servicio financiero a registra un fuerte crecemiento di casi 10%, sigui pa construccion (9%), transporte (7%) y comercio (7%).

CBS ta indica cu Corsou a beneficia di un aumento den cantidad di turista, specialmente for di Suramerica, Canada y Merca. E gasto adicional di turista a genera mas entrada pa hotelnan, restaurantnan y otro negoshi den economia.

Sector di construccion tambe a beneficia danki na inversionnan den proyecto turistico y bienes y raiz (real estate) particular. Un aumento den permiso di construccion y proyecto di mayor balor a contribui na e expansion economico.

No tur sector a registra crecemiento. Industria a baha cu 4,5%, principalmente debido na menos trabounan di mantenimiento den haf. Educacion a registra e mayor caida, cu casi 10%, relaciona cu un reduccion den cantidad di estudiante.

CBS a aclara cu e cifranan ainda ta preliminar y por cambia ora tur sector entrega nan informacion definitivo.