The Wine Room a celebra 14 aña di excelencia cu musica, biña y sabor

ORANJESTAD   – E establecimento The Wine Room a celebra un momento special recientemente cu un evento elegante pa conmemora su 14 aña di excelencia den e industria gastronomico di Aruba. E anochi especial a reuni cliente, amigo y amantenan di bon biña y cuminda pa un celebracion yen di ambiente agradable, entretenimiento y sabor refina. Un di e punto climatico di e celebracion tabata e presentacion musical di e trio Kimica, lidera pa e conocido artista Chris Kross. E grupo a brinda un show energetico y memorable cu a crea e ambiente perfecto pa e invitadonan disfruta di e ocasion.

SOMMELIER 

Un papel importante den e celebracion tabata pa The Wine Room, e wine bar local di Aruba propiedad di empresario y sommelier Monrick Croes. Conoci pa su pasion pa biña y su conocimiento profundo di e sector, Croes y su ekipo a presenta un seleccion special di biña boutique cu a combina perfectamente cu e diferente plato sirbi durante e anochi.

POESIA 

Un amante di biña di Argentina a bay asina leu di scirbi un tipo di poema pa e ocacion. Aki e amigo  a manda un mensaje caloroso pa celebra 14 aña di The Wine Room, resaltando cu tras di e exito di e negocio tin hopi mas cu solamente biña. Nan a enfatisa e añanan di trabou duro, conocemento, pasion, bon gusto y dedicacion na mundo di vino y gastronomia. Nan a expresa cu nan ta considera nan mes mas amigo cu cliente, algo cu, segun nan, ta refleha no solamente e profesionalismo di Monrick, sino tambe e calidad humano cu ta tras di The Wine Room.