MEP a pidi claridad di Mike Eman tocante transicion di poder

ORANJESTAD – Lider di MEP, Evelyn Wever-Croes, a reacciona cerca Noticiacla diamars mainta, riba e anuncio di Mike Eman cu e lo entrega tanto liderazgo di AVP como e puesto di Minister-President durante e siguiente lunanan.

RESPONSABILIDAD 

Den un comunicado, MEP a reconoce e añanan di servicio publico di Eman y su contribucion na Aruba. Sinembargo, e partido a enfatisa cu e funcion di Minister-President no ta un cargo di partido solamente, sino un responsabilidad na henter pueblo di Aruba. 

PREGUNTA IMPORTANTE 

Segun MEP, e anuncio di e retiro ta crea pregunta importante tocante e futuro liderazgo di gobierno, especialmente den un momento cu Aruba ta enfrenta decisionnan importante, incluyendo e discusion riba HOFA y otro tema nacional relevante.

DERECHO DI SA

E partido ta considera cu pueblo tin derecho di sa con e proceso di transicion lo wordo maneha, con un nobo Minister-President lo wordo escogi y con continuidad den gobernacion lo wordo garantisa durante e periodo cu ta bin. “Aruba ta den un momento crucial. E transicion a cuminsa awe y e responsabilidad pa informa y duna claridad no por warda,” MEP a expresa.

PRESENTA PLAN DI TRANSICION 

Pa e motibo ey, MEP ta pidi cu Mike Eman presenta su plan di transicion y splica e siguiente pasonan den Parlamento, pa asina garantisa transparencia y stabilidad den e proceso politico cu ta desaroyando.