Personal di DAO ta protesta contra mudamento pa edificio sin bentana

ORANJESTAD – Personal di Directie Arbeid en Onderzoek (DAO) a lanta nan bos contra un decision di muda nan oficinanan pa un edificio cu, segun nan, no ta adecua pa uso como lugar di trabou. Den un comunicado, e trahadornan a expresa preocupacion serio tocante salud, seguridad y e falta di dialogo cu Ministerio.

DEPOSITO ADAPTA 

Segun e personal, e local nobo ta un deposito adapta cu no tin bentana ni ventilacion natural suficiente. Nan ta advirti cu e condicionnan por crea problema di salud fisico y mental, incluyendo estres, ansiedad y e asina yama “Sick Building Syndrome”. Tambe nan a menciona preocupacion tocante humedad y problematica historico di schimmel den e edificio.

NO TA APLICA PRINCIPIO PROPIO NA LUGAR DI TRABOU

E trahadornan ta critica cu gobierno ta participa den conferencia internacional riba derecho laboral, salud mental y bienestar di trahador, mientras cu, segun nan, e mesun principionan no ta wordo aplica den nan propio lugar di trabou.

FALTA COMUNICACION 

DAO a expresa cu e comunicacion cu Ministerio no a produci resultado y cu nan ta sinti cu decisionnan ta wordo imponi sin consulta suficiente. Nan ta pidi cu e mudamento wordo suspendi te ora cu un espacio di oficina adecua y seguro haya disponibilidad. Den nan comunicado, e personal a enfatisa cu nan no ta busca luho, sino simplemente un ambiente di trabou digno, saludabel y seguro pa sigui sirbi e comunidad di Aruba di manera responsable. NOTA: E potret ta un dramatisacion di e informacion presenta.