Minister Dowers buscando solucion despues di protesta di Recherche pa falta di personal

ORANJESTAD – Minister di Husticia Arthur Dowers a expresa comprension pa e preocupacionnan presenta pa personal di Recherche di KPA, despues cu e equipo a organiza un walk out dialuna mainta.

E accion tabata relaciona principalmente cu e falta di personal, e carga di trabou creciente y reciente cambionan tocante bon di cuminda durante overtime.

Dowers a bishita e protesta y a reuni cu rechercheurnan y Sindicato di Polis Aruba (SPA) pa dialoga tocante solucionnan a corto y largo plazo.

Segun e minister, e problema di falta di personal no ta nobo y ta resultado di varios añanan cu inversion insuficiente den reclutamento di polis. E situacion aki a crea presion adicional riba personal existente y riba investigacionnan criminal.

Dowers a indica cu gobierno, liderazgo di KPA y SPA ta trahando hunto pa identifica solucionnan structural pa fortalece e capacidad di Recherche y reduci e carga di trabou.

Mientras cu solucionnan permanente lo tuma tempo pa produci resultado, gobierno ta busca manera pa yena e escasez actual cu e recurso humano disponible.

E minister a conclui expresando apreciacion pa e trabou importante cu personal di Recherche ta realiza diariamente pa mantene seguridad y cumplimento di ley na Aruba.