Presupuesto Supletorio 2026 a bay Raad van Advies cu fondo di emergencia di Afl. 29 miyon

ORANJESTAD – Minister di Finansa Geoffrey Wever a anuncia cu e prome Presupuesto Supletorio 2026 di Gabinete AVP-FUTURO a wordo entrega na Raad van Advies pa evaluacion.

Segun Wever, e presupuesto ta cumpli cu tur normanan financiero estableci den ley y ta mantene e meta di finansa publico duradero. Gobierno ta premira un saldo financiero di Afl. 80 miyon pa Pais Aruba y Afl. 127 miyon pa e sector colectivo, mientras e nivel di debe lo baha te na 59% di Producto Interno Bruto.

Un punto importante den e presupuesto ta e creacion di un fondo di emergencia di Afl. 29 miyon pa mitiga e impacto economico di e tensionnan y conflicto den Medio Oriente. E fondo lo permiti gobierno absorba parcialmente e subida di prijs di gasolina y diesel, reduci accijns, duna un reparatietoeslag temporal di Afl. 100 pa trahadornan cu entrada entre salario minimo y bestaansminimum, y aumenta e subsidio pa personanan cu discapacidad cu Afl. 100 pa luna.

Gobierno tambe ta proyecta un aumento di casi Afl. 10 miyon den entrada fiscal gracias na e desaroyo positivo di economia di Aruba.

Despues di ricibi e conseho di Raad van Advies y prepara su reaccion oficial, gobierno lo presenta e prome cambio di Presupuesto 2026 na Parlamento pa aprobacion final.