Gobierno a cambia ‘Premio Exelencia pa deporte’ pa ‘STREA Deportivo Aruba’

ORANJESTAD – Minister di Deporte, Gerlien Croes, a presenta  e nobo imagen di STREA Deportivo Aruba oficialmente, e evento anual cu ta reconoce e mehor atletanan y dirigentenan deportivo di Aruba. E premio tabata anteriormente conoci como Premio Excelencia den Deporte.

Durante e lanzamiento, Croes a destaca cu, aunke e evento a haya un identidad visual nobo, su mision principal ta keda mescos: honra y balora talento deportivo local. E minister a expresa satisfaccion cu e iniciativa a keda existi apesar di cambionan politico, pasobra deportistanan ta representa un fuente di orguyo nacional.

Director interino di IBISA, William Erasmus, a splica cu e proceso di nominacion y seleccion lo bira mas transparente gracias na un plataforma digital nobo. A traves di streadeportivoaruba.com, federacionnan deportivo por registra nominacionnan y publico por sigui e proceso di cerca.

Fundacion Lotto pa Deporte tambe a reafirma su apoyo na e evento, tanto financieramente como pa medio di fondo cu ta beneficia federacionnan deportivo na Aruba.

Croes a splica cu e nomber STREA ta representa Superando Talento, Resaltando cu Esfuerso y Ambicion, resaltando e dedicacion y disciplina cu ta necesario pa alcanza exito den deporte.

Cu e rebranding aki, STREA Deportivo Aruba ta busca fortalece aun mas e reconocimiento di atletanan y dirigentenan cu ta contribui na desaroyo y exito di deporte arubiano, tanto local como internacionalmente.