Mike Eman ta baha como prome minister riba 1 di januari 2027

ORANJESTAD – Comienso di otro aña, Aruba ta conoce un prome minister presidente nobo! Durante un reunion completamente yen na Cas di Partido algun anuncio grandi a wordo haci dor di e lider di Partido Mike Eman. Lider di AVP y actual Minister-President Mike Eman a anuncia dialuna anochi dos decision historico y di gran importancia cu ta marca e comienso di un capitulo nobo pa AVP y pa Aruba. Eman a anuncia cu durante e Congreso di Liderazgo di AVP na september 2026, e lo entrega liderazgo di partido na un generacion nobo. Esey tabata conoci. Loke a bin como sorpresa, ta e decision cu ademas, e la comunica cu e lo termina su cargo di Minister-President di Aruba na 1 di januari 2027. Cu e decision aki ta cera un epoca den cual Eman a lidera AVP pa binti-cinco aña, y a ocupa cargo di Minister-President durante tres periodo diferente di gobernacion.

Mike Eman su carera politico lo bay den historia cu e recordnan grandi: Mike Eman ta e votegetter mayor di Aruba desde Status Aparte y a hiba partido AVP na 13 asiento, cu ta otro record electoral desde Status Aparte. Su logronan den gobernacion ta keda graba den historia, riba tereno economico, social y infrastructura, cambionan grandi a worde realisa. Su vision pa Reino Hulandes ta keda esun mas inspirativo di tur tempo. Su amor pa traha pa esnan di menos recurso no conoce igual. Un lider cu vision y pasion cu lo ta un ehempel pa e generacionan cu ta bin. Di momento cu e a drenta poltica y te awe ta un bastion di speranza. Su resultado electoral na votonan preferencial na number 29 probablemente tambe lo keda un record pa hopi tempo, dificil pa iquala.

Den un discurso marca pa gratitud, reflexion y confiansa den futuro, Eman a papia tocante responsabilidad cu liderazgo ta hiba cune. Den e siguiente 6 lunanan Eman a enfatisa cu e ta spera di por termina algun projecto social importante pa esnan mas vulnerable den nos comunidad y tambe pa e barionan mas vulnerable

Den su discurso e a para keto na aumentonan grandi pa pensionadonan cu a keda realisa como compromiso importante di AVP durante eleccion. Tambe aumento di bijstand y pakete di remedi cu a worde completa. Eman a comparti informacion tambe riba e reciente decision pa aumenta reparatietoeslag pa esnan cu salario bao di Afl. 2500,==. Eman a expresa cu den e siguiente 6 lunanan e ta spera tambe cu por yega na un acuerdo cu partnernan social riba acopla salario minimo na “bestaansminimum”. Actualmente salario minimo ta Afl. 500,== bao di bestaansminimum. E proposicion ta pa den tres anja e suma di salario minimo ta acopla na “bestaansminimum”. “Ya nunca mas un persona cu salario minimo tin un deficit presupuestario pa por alcansa un bida husto”. Tambe Eman lo enfoca pa hunto cu colega Mervin Wyatt-Ras pasa den Parlamento e ley cu nan a manda awor pa Raad van Advies pa duna famianan cu mucha special un ajudo finaciero. Den e mesun contexto a anuncia e aumento di bijstand pa gehandicapnan cu Afl. 100,== pa luna pa juda cubri aumento di costo di vida. Tambe Eman a bisa cu e ta spera di por duna incio na MFA San Nicolas durante e 6 lunanan aki y renovacion di Betarixschool y Julianaschool. E a mustra tambe riba e mehoracion cu a realisa pa docentenan di school 

Eman a sera e anochi enfatisando cu liderazgo berdadero no ta consisti solamente di sirbi y construi, sino tambe di prepara na tempo un generacion nobo pa tuma e responsabilidadnan di mañan.

"Ningun lider no ta mas grandi cu e proposito cu e ta sirbi. E fortaleza di AVP semper tabata cu e ta mira mas aya di personanan y generacionnan. Eman a dedica un momento pa reconoce e hopi personanan cu a sostene y acompañe durante su carrera politico: miembro di partido, voluntario, dirigente, representantenan electo, minister-nan, familiar-nan y, mas cu tur, Pueblo di Aruba.

El a expresa su profundo gratitud pa e confianza cu a wordo deposita den dje durante tanto aña y a bisa cu e ta un privilegio extraordinario pa por sirbi su pais durante periodonan di gran reto y momento importante den desaroyo nacional di Aruba.

Na mes momento, el a enfatisa cu su traspaso como lider di partido na september y como Minister-President final di anja no ta nifica un despedida di e idealnan na cual e a dedica su bida.

"Mi responsabilidad pa Aruba no ta caba cu un cargo ni cu un titulo. Mi amor pa nos pais, mi fe den nos pueblo y mi conexion cu AVP ta keda mescos. Despues di 1 di januari 2027 tambe, mi lo sigui dedica mi curason y alma na partido, na nos comunidad y na bienestar di Aruba."

Cu e Congreso di Liderazgo na september y e transicion di cargo di Minister-President na 1 di januari 2027, AVP ta tuma conscientemente un paso den direccion di relevo generacional, manteniendo fiel na e balornan cu a guia partido desde su fundacion: servicio, responsabilidad, solidaridad y amor pa Aruba.