Brete: Decepciona cu a alega director di FIU den complot contra otro politico

ORANJESTAD – Declaracion contra su persona algun tempo atras di un ex minister den direccion di e Director di Financial Intelligence Unit (FIU) Aruba, Angelo Brete, a lag’e babuca, segun e director mes. Tabata durante e programa Noticiacla LIVE unda cu periodista Tito Laclé a confronta e director cu e caso aki cu a tuma lugar basta tempo atras. Probechando di e momento di tin e director den e programa, a dicidi di confronte cu e asunto aki, aunke ta hopi tempo pasa esaki a tuma lugar.

E CASO

Ta trata di un caso unda cu un politico Lampe e tempo ey, lo a haci mencion cu e Director di FIU lo tabata den Conseho di Minister hunto cu un otro director, pa traha un complot hunto cu ex-minister president di Aruba di e tempo ey, contra awor ex politico Allan Howell. E combersacion aki a wordo graba y a circula den social media. Esaki a bira e caso Diamante cu actualmente Corte Superior ta tratando. E caso aki a conduci na entrega di retiro di Gabinete Wever-Croes e tempo ey. Brete a expresa su decepcion profundo tocante e grabacion aki, na Laclé.

SORPRENDI

Segun Brete, e nunca tabata presente den un reunion semehante. E la keda sorprendi cu e comentarionan cu a wordo haci. “Esaki a decepciona mi hopi, tanto como persona como den mi funcion di director di FIU,” e la declara. Brete a enfatisa cu FIU Aruba nunca a participa den discucion tampoco accionnan politico, y vooral no pa conspira contra ningún persona. “Mi nunca lo pone reputacion di mi Pais den riesgo, pasobra algo semehante por tin consecuencia severo pa Aruba, ora política ta mete den trabao di un FIU. Segun e director, si un oficina di FIU lo a involucra den actividadnan di e naturaleza ey, e consecuencia internacionalnan pa Aruba por ta extremadamente serio. E la agrega cu afortunadamente FIU Aruba no a ricibi ningun pregunta of preocupacion for di instancia internacional tocante e asunto. Algo cu e la atribui na e reputacion y profesionalismo cu e organisacion a construi durante añanan.

MISION PRINCIPAL DI FIU

Brete a usa e oportunidad pa destaca cu e mision principal di FIU ta proteha integridad di e sistema financiero di Aruba door di preveni y combati crimen financiero. Segun e, un di e tareanan importante di FIU ta educa esnan cu tin e obligacion pa entrega reporte di transaccionan inusual na FIU y den futuro nan lo dedica tempo tambe pe aporta na educa nos comunidad riba e tema di labamento di placa y financiamento di terrorismo. “Nos institucionnan ta serio y independiente,” Brete a enfatisa. “Gobierno di Aruba semper a brinda nos e recursonan financiero necesario pa haci nos trabou, y esaki ta hasi posible cu FIU ta opera independiente y sin interferencia politico.”

INDEPENDIENTE

E la splica cu FIU ta rindi cuenta administrativamente na Ministro di Finansa, actualmente Geoffrey Wever, pero cu ningun ministro por pidi informacion of duna e entidad aki ordo tocante investigacionnan of operacionnan di e organisacion. Lo ta algo castigabel si FIU divulga informacion na personanan of organisacionnan cu no ta competente pa risibi esaki. “Un ministro no por yama y duna orden. E no por haci esey. Mescos cu tin limitacionnan den relacion entre Ministerio Publico y Ministro di Husticia, tambe tin limitacionnan cla pa proteha independencia di FIU,” e la declara.