Brete: “Economia di Aruba ainda ta depende hopi di cash, cu ta crea vulnerabilidad”

ORANJESTAD – Director di Financial Intelligence Unit (FIU) Aruba, Angelo Brete, a expresa preocupacion tocante e cantidad grandi di transaccionnan cu involucra efectivo cu ainda ta wordo reporta na Aruba. Segun Brete, durante e programa Noticiacla LIVE cu periodista Tito Laclé, hopi di e raportahenan cu FIU ta ricibi, ta relaciona cu uso di cash. Aunke esey no kiermen cu tin algo ilegal pasando, e cantidad di efectivo den circulacion por representa un riesgo pa actividadnan criminal manera lavado di placa. “Aruba ainda ta un economia cu ta depende hopi di cash. Bo por habri un negoshi, bay banco, saca un cantidad grandi di placa cash, pone esey den un maleta y bay cu ne,” Brete a splica. Segun e director, e uso amplio di efectivo ta haci algun sectornan mas vulnerable pa labamento di placa. Pa e motibo ey, FIU ta sigui monitorea e desaroyonan y analisa raportahenan cu por indica actividad sospechoso. Brete a indica cu e hecho cu FIU ta continua ricibi un cantidad significativo di raportahenan, ta confirma cu tin necesidad di mantene supervision y prevencion. Sin embargo, den su opinion personal, algun sectornan ainda por aporta mas raportaheinan di transaccion sospechoso.

MAS RAPORTAHE 

“Mi opinion personal ta cu tin sectornan cu ainda por entrega mas raportahenan inusual. Ta un area cu nos mester sigui cuida y fortalece pa preveni abuso di nos sistema financiero,” e la declara. Segun Brete, e mision principal di FIU ta continua proteha integridad di e sistema financiero di Aruba y detecta tempranamente indicacionnan di posible actividad criminal.