A.T.A. ta certifica mas cu 170 profesional pa fortalece excelencia den turismo

ORANJESTAD – Aruba Tourism Authority (A.T.A.) a conclui cu exito su Siman Anual di Entrenamento 2026, un iniciativa dedica na fortalecemento di conocimiento, profesionalismo y excelencia den sector turistico di Aruba.

Durante e prome siman di juni, centenares di profesional, frontliner y representante di diferente empresa y institucion relaciona cu turismo a participa den varios entrenamento y actividadnan educativo enfoca riba mehoracion di servicio y experiencia di bishitantenan.

PROGRAMA DI CERTIFICACION PA GUIA DI TOUR

Un di e puntanan culminante tabata e Programa di Certificacion pa Guia di Tour, presenta pa Aquila Center for Cruise Excellence. Mas cu 50 guia di tour a completa e curso intensivo y a ricibi un certificacion internacional, fortaleciendo nan conocimiento y capacidad profesional.

SERVICE EXCELLENCE AMPLIFIED

Ademas, mas cu 120 participante a completa e programa Service Excellence Amplified, cu ta enfoca riba crea experiencianan memorable pa bishitantenan y sigui eleva e standardnan di servicio den Aruba. Como parti di e programa, participantenan tambe a tuma parti den excursionnan educativo, incluyendo un bishita na un crucero di Royal Caribbean y un recorrido cultural y historico den centro di Oranjestad. CEO di A.T.A., Ronella Croes, a felicita tur participante y a destaca cu e participacion record ta mustra e compromiso continuo di sector turistico pa inverti den calidad y servicio. “E nivel di participacion cu nos a mira e aña aki ta confirma cu e industria ta serio tocante desaroyo profesional y excelencia den servicio,” Croes a expresa. Representantenan di decenan di empresa, agencia gubernamental y organizacionnan relaciona cu turismo a participa den e entrenamentonan, incluyendo operadornan di tour, hotelnan, companianan di transporte, autoridad portuario, inmigracion y otro actor importante den e cadena turistico. A.T.A. a reafirma su compromiso pa sigui inverti den educacion, innovacion y desarrollo profesional, cu e objetivo di mantene Aruba entre e destinacionnan turistico mas prestigioso di Caribe y mundo.