Defensa di Otmar Oduber a pidi absolucion total y cuestiona legitimidad di investigacion Flamingo

ORANJESTAD – Defensa di ex-minister Otmar Oduber a lansa un atake fuerte contra Ministerio Publico y e investigacion penal Flamingo durante audiencia di apelacion diahuebs mainta den Corte di Apelacion. Den un documento di mas cu 50 pagina, abogadonan di Oduber a argumenta cu e investigacion a wordo construi riba informacion no verifica, irregularidadnan procedural y supuesto influencia politico, y a pidi pa Corte di Apelacion declara Ministerio Publico no admisibel of absolve Oduber di tur acusacionnan.

TARDANSA DEN CASO

Segun e defensa, e caso a dura mas cu seis aña y ta relaciona principalmente cu decisionnan administrativo y politico cu Oduber a tuma durante su periodo como minister di Ordenacion Territorial, Infraestructura y Medio Ambiente (ROIM) entre 2017 y 2019. Nan ta sostene cu e asunto no mester tabata maneha den derecho penal, sino den esfera politico y administrativo.

SUPUESTO ESTAFA CASO MALMOK

E defensa a critica   e condena di Promer Instancia fuertemente, den cual Oduber a wordo declara culpabel pa supuesto estafa den caso Malmok, estafa den e caso di supuesto “spookambtenaren” y abuso di cargo. Segun abogadonan, Corte a ignora evidencia critico y a basa su conclusion riba un construccion di prueba contradictorio.

BCI

Un di e puntonan principal di defensa ta cu e investigacion Flamingo a cuminsa exclusivamente riba informacion proveniente di Bureau Criminele Inlichtingen (BCI) na september 2019. Segun e defensa, e informacion aki nunca a wordo confirma y tabata relaciona cu persona y terenonan cu finalmente nunca a forma parti di e acusacion oficial presenta contra Oduber.

LANDSRECHERCHE Y OM 

E abogadonan ta argumenta cu Landsrecherche y Ministerio Publico tabatin aceso na documentacion gubernamental cu por a confirma of refuta e informacion den solamente un dia di trabou, pero nunca a haci esey promé cu nan a aplica medidanan invasivo manera interceptacion di telefon y huiszoeking.

TCI

Defensa tambe a cuestiona informacion proveniente di Team Criminele Inlichtingen (TCI). Segun e documento,   e ex-hefe di TCI mes a reconoce durante declaracion como testigo, cu no por exclui cu informantenan a suministra informacion falso cu motivonan politico pa haci daño na Oduber. Defensa ta alegando cu e informacion aki tampoco a wordo verifica debidamente.

DETENCION ODUBER 

Otro acusacion serio segun e ekipo di defensa, ta cu Ministerio Publico a intenta di evita un decision anterior di un huez-comisario cu a rechasa pa mantene Oduber deteni. Segun defensa, despues di e decision ey, Ministerio Publico a presenta informacion di TCI como base nobo pa prolonga e privacion di libertad di Oduber.

DENUNCIA EX MINISTER TROMP 

Defensa tambe ta cuestiona e denuncia presenta door di ex-minister Marisol Tromp. Segun nan, e denuncia no a nace di iniciativa propio, sino despues cu Tromp a wordo yama  door Landsrecherche y orienta tocante su obligacion legal pa raporta posible hecho penal. Ademas, e defensa a señala cu e denuncia a wordo presenta durante un periodo di fuerte tension politico den cual Tromp tabata perdi respaldo dentro di su propio partido.

DERECHO DI ODUBER 

Den su conclusion, e defensa a sostene cu e suma di iregularidadnan alega den e investigacion ta afecta e derecho di Oduber seriamente di haya un proceso husto. Pa e motibo ey, nan ta pidi Corte di Apelacion pa declara Ministerio Publico no admisibel, exclui evidencia obteni durante investigacion of, como minimo, absolve Oduber di tur acusacionnan. Corte lo continua cu e analisis di e argumentonan presenta den apelacion prome cu dicta su sentencia definitivo den e caso Flamingo.