Corte ta duda riba responsabilidad di Aruba den planta di trata awa na Bubali

ORANJESTAD – Corte Comun di Husticia a expresa duda tocante responsabilidad di Pais Aruba den e   disputa legal largo rond di e planta di tratamiento di awa sushi na Bubali.

Segun Corte, un desicion anterior por significa cu Aruba desde juli 2024 no tin control ni autoridad mas riba e instalacion, loke por haci cu e reclamo di Amsterdam Manor Beach Resort contra Pais Aruba posiblemente no por wordo aproba.

Esaki ta sali for di un sentencia intermedio cu Corte a emiti den apelacion entre Amsterdam Manor, Pais Aruba y operador Aruba Wastewater Sustainable Solutions (AWSS). E hotel ta alegando ya pa largo tempo cu e planta di tratamiento no ta funciona adecuadamente y cu e ta causa molestia.

Den e desicion intermedio, Corte ta referi na un sentencia anterior di 31 di maart 2026 den un proceso principal entre Amsterdam Manor y Pais Aruba. Den e caso ey, no tabatin contestacion contra e afirmacion cu, desde 1 di juli 2024, Pais Aruba no tabatin control ni autoridad mas riba e planta di tratamiento di awa sushi.

Segun Corte, den e proceso urgente actual posiblemente mester wordo parti di e supuesto ey. Si esey ta e caso, e reclamacionnan contra Pais Aruba por fracasa simplemente pa e motibo ey.

CORTE TA PONE CUESTION RIBA PARTI DI APELACION

Ademas, Corte a pone cuestion riba un parti di e apelacion cu Amsterdam Manor a presenta contra AWSS. Segun Corte, posiblemente no tabata permiti pa presenta un apelacion incidental contra AWSS, paso cu e compania mes no a presenta apelacion contra e sentencia anterior.

Pa e motibo ey, Corte ta considera provisionalmente cu Amsterdam Manor posiblemente no ta admisibel den e parti di e procedimiento contra AWSS.

Prome cu tuma un desicion definitivo, Corte a duna tur partido involucra oportunidad pa presenta nan punto di bista por escrito tocante e cuestionnan procesal aki. Pa esey, e caso a wordo referi pa audiencia administrativo di 9 di juni.