Criticanan riba HOFA ta centra riba autonomia, rol di Parlamento y poder di Reino

ORANJESTAD – Mientras Gobierno di Aruba y Hulanda ta presenta e propuesta di ley HOFA (Houdbare Overheidsfinanciën Aruba) como un instrumento pa garantiza finanzas publico solido y acceso na financiamiento mas barata, diferente sectornan politico, sindical y constitucional na Aruba ta sigui expresa preocupacion serio tocante e impacto cu e ley lo por tin riba autonomia di e pais.

Un di e criticanan principal, ta cu HOFA lo pone limitacionnan adicional riba e capacidad di Aruba pa tuma desicionnan independiente tocante su propio finanzas publico. Segun oposicion y varios experto, e propuesta ta duna un papel significativo na Reino Hulandes den supervision di maneho financiero di Aruba, algo cu nan considera un debilitamento di e autonomia cu Aruba a obtene cu Status Aparte na 1986.

Otro punto di critica ta e proceso cu a conduci na formulacion di e ley. Parlamentarionan di oposicion a argumenta cu Parlamento no a wordo involucra suficientemente durante e negociacionnan inicial y cu e proyecto a avanza den Reino prome cu e debate democratico local a tuma lugar completamente. Segun nan, esaki ta afecta e papel constitucional di Parlamento como representante directo di pueblo.

Tambe tin preocupacion tocante un articulo specifico den e propuesta, conocido como Articulo 38, cu segun e Raad van Advies di Aruba por crea un situacion unda modificacionnan importante den legislacion financiero local mester conta cu aprobacion na nivel di Reino. E conseho consultivo a adverti cu esaki por limita e autoridad di Gobierno y Staten di Aruba y inclusivo por crea un precedente pa intervencionnan futuro den otro area di gobernacion.

Sindicatonan tambe a manifesta resistencia contra HOFA. Segun nan, compara Aruba cu Corsou y Sint Maarten no ta correcto paso cu Aruba a obtene su Status Aparte den circumstancianan diferente. Nan ta argumenta cu supervision financiero permanente via un ley di Reino no tabata parti di e acuerdo original cu a crea autonomia di Aruba y, por  representa un paso atras den e desaroyo constitucional di e pais.

Di otro banda, Gobierno di Aruba y Hulanda ta sostene cu HOFA no ta elimina autonomia, sino cu e ta establece reglanan pa garantiza  stabilidad financiero a largo plazo. Segun e proponentenan, e ley lo permiti Aruba beneficia di facilidadnan di prestamo cu interes mas abou, refinanciamento di debe existente y un reduccion den gastonan financiero, librando mas recurso pa inversion den educacion, salud y economia.

E debate alrededor di HOFA ta sigui un di e temanan politico mas sensitivo na Aruba. Mientras partidarionan ta enfatisa  stabilidad financiero y acceso na financiamiento mas favorable, criticonan ta adverti cu e prijs por ta un reduccion gradual di autonomia y influencia democratico local. E discusion probablemente lo sigui domina agenda politico durante e proximo lunanan mientras e propuesta ta sigui su trayecto legislativo den Reino Hulandes