OM ta exigi mantene condena contra ex parlamentario Alan Howell

ORANJESTAD – Procurador General a pidi Hof Comhun di Husticia pa confirma e sentencia cu anteriormente a wordo imponi contra ex-parlamentario Alan Howell den e caso penal Diamante. Durante tratamento di e apelacion, Ministerio Publico a sostene cu no tin motibo pa modifica e castigo cu Corte di Promer Instancia a impone. Howell a wordo condena anteriormente na dos aña di prizon, di cual seis luna ta condicional, hunto cu un multa di 35 mil florin. Ademas, Corte a ordena confiscacion di 15 mil florin cu anteriormente a wordo encuentra den su posesion.

PROME INSTANCIA

Den Promer Instancia, Corte a haya legalmente y convincentemente comproba cu Howell, den su funcion como presidente di un fundacion cu tabata administra fondonan di fraccion politico POR, a malversa mas cu 195 mil florin. Segun e sentencia, e placa a wordo desvia door di factura falso y transaccionnan relaciona cu companianan inexistente. Durante e audiencia den apelacion, defensa, lidera door di abogado mr. Herrera, a cuestiona seriamente e investigacion criminal. Segun e defensa, tabatin irregularidadnan durante e proceso investigativo y pa e motibo ey a solicita cu Ministerio Publico wordo declara no admisibel den e caso.

RECHASO

Sinembargo, anteriormente Hof ya a rechasa tur peticionnan adicional di defensa pa amplia e investigacion, incluyendo peticion pa tende testigonan adicional y agrega documentacion extra na expediente. Hof a conclui cu no tabatin suficiente base ni necesidad pa haci investigacion adicional.

CONMOCION CAUSA

E caso Diamante a causa hopi conmocion den Aruba, pasobra Howell no solamente tabata un ex-parlamentario, sino tambe un agente policial cu mas cu 18 aña di servicio. E condena penal anteriormente tambe a conduci na accionnan administrativo contra dje, aunke posteriormente Corte Administrativo a determina cu su retiro como polis no tabata debidamente motiva, ya cu e actonan menciona den e caso a tuma lugar den su funcion politico y no como empleado publico.

Awor ta na man di Hof di Apelacion pa dicidi si e condena original lo keda intacto of si lo tin algun modificacion den e sentencia final. E decision ta wordo spera den e dianan benidero.