Corte ta pospone revision di castigo di bida largo di C.Hermanus.te 2027

ORANJESTAD - Corte Comun di Husticia a dicidi pa pospone te 2027 e revision di e castigo di prison di bida largo impone na C.A.Hermanus. 

Desde 2014, ley na Aruba ta stipula cu un castigo di bida largo mester wordo revisa ora e preso cumpli 20 aña den prison. E revision ta pa determina si eventualmente tin base pa considera libertad condicional, teniendo cuenta cu si e persona ainda ta representa un peliger y si e por reintegra den comunidad.

E caso di C.A.Hermanus. ta e prome biaha cu Aruba ta pasa door di un revision di e tipo aki. E procedimiento a cuminsa na februari 2026 y a wordo posponi pa 31 di augustus, entre otro pa duna oportunidad na famianan di victimanan pa presenta nan punto di bista.

Durante e sesion reciente, famia di un di e victimanan a declara claramente cu nan ta contra un eventual liberacion. Segun nan, un factor importante ta cu C.A.Hermanus. nunca a mustra arepentimento.

C.A.Hermanus. mes tabata presente den sala, y Corte Comun a inform'e cu e posicion di e famia lo forma parti explicito di e evaluacion final.

Segun Corte, ainda tin hopi trabou investigativo pa determina ki condicionnan eventualmente mester wordo cumpli prome cu por considera libertad. Pa e motibo, e revision a wordo posponi cu un aña. Ministerio Publico tambe mester presenta un actualizacion den seis luna.

E proceso ta wordo sosteni pa e “Comision Castigonan di Bida Largo”, cu ta recopila e informacion necesario pa Corte por evalua si continuacion di e castigo ainda ta sirbi un meta rasonabel, teniendo cuenta cu seguridad publico y interesnan di victimanan y nan famia.