De Freitas: SNBA no ta na favor di desmantelacion total di refineria

ORANJESTAD – Presidente di San Nicolas Business Association (SNBA), Errol de Freitas, a comparti su vision tocante futuro di refineria y desaroyo economico di San Nicolas durante un entrevista amplio cu Tito Laclé den programa Noticiacla LIVE diamars anochi.

DESMANTELACION PARCIAL DI REFINERIA

Durante e conversacion, de Freitas a expresa cu SNBA no ta completamente na favor di desmantelacion total di refineria, pero si ta di acuerdo cu desmantela e seccionnan cu ya no tin uso ni balor economico. Segun de Freitas, e tereno di refineria ta cubri casi cuatro miyon metro cuadra y ainda tin diferente facilidadnan cu por wordo reutilisa pa otro actividadnan industrial y comercial. “Tin parti di refineria cu definitivamente no por wordo usa mas y esakinan si por wordo desmantela. Pero tambe tin infrastructura cu ainda tin balor y cu por yuda Aruba den futuro,” de Freitas a comenta.

REUTILISA INFRASTRUCTURA EXISTENTE

E la splica cu tanto profesionalnan local como internacional ta asesorando SNBA tocante posibilidadnan pa reutilisa e infrastructura existente. Segun e, San Nicolas semper tabata conoci como un ciudad industrial y e manera mas lihe pa reactiva e economia di e distrito ta door di actividadnan industrial cu Aruba ya conoce. “No ta trata di habri mesun refineria di antes. Nos ta papia di un upgrade completamente diferente,” de Freitas a enfatisa.

CAPACIDAD DI ALMACENAMIENTO

Presidente di SNBA a menciona specificamente e capacidad di almacenamiento como un oportunidad importante pa Aruba. Segun e, varios tanki bieuw por wordo adapta y movi pa otro seccionnan cu ainda por wordo utiliza. “Actualmente hopi pais tin problema cu capacidad di almacenamiento. Guyana tin problema, Venezuela tin problema. Aruba por bira parti di solucion,” e la bisa. 

FALTA DI INFORMACION

De Freitas tambe a relata cu e organisacion a sostene un reunion cu Gobierno durante luna di september aña pasa pa presenta nan preocupacionnan y vision tocante futuro di refineria. Sinembargo, e la reconoce cu Gobierno naturalmente tin acceso na informacion cu no ta disponibel pa sector privado.

PREOCUPA CU E DIRECCION ECONOMICO

Durante e entrevista, de Freitas a cuestiona e direccion economico cu Aruba ta sigui actualmente y a expresa preocupacion cu pais por bira demasiado dependiente di turismo y trabounan basico. “Si Aruba ta bay bira solamente un ‘pit stop’, den kico nos lo educa nos hobennan? Bartender? Bellman? Busboy?” de Freitas a cuestiona. Segun e presidente di SNBA, Aruba mester pensa seriamente tocante futuro di educacion, energia y capacidad industrial di e pais, pa asina crea oportunidadnan sostenible pa futuro generacionnan.

SAN NICOLAS COMO CABAY DI CAMPAÑA

E la tambe expresa e frustracion cu San Nicolas ta bira tema principal durante campañanan electoral, pero despues di eleccionnan hopi promesanan no ta wordo cumpli. “Tur campaña politico ta usa San Nicolas como prioridad, pero despues eleccion, hopi cos ta muri,” de Freitas a comenta.

Segun e, San Nicolas ainda ta representa un di e oportunidadnan economico mas grandi pa Aruba, pero ta falta accion concreto y vision a largo plazo pa realisa e potencial completo di distrito.

De Freitas a conclui cu Aruba mester tuma decisionnan strategico awor pa  sigura cu San Nicolas no ta perde su identidad industrial y pa crea un economia mas diversifica pa futuro di isla.