Gobierno a habri e prome di seis “Zona di Desperdicio” pa mantene isla limpi

ORANJESTAD – Aruba a duna un paso importante rumbo na un isla mas limpi cu apertura oficial di e proyecto “Zona di Desperdicio”, un iniciativa cu forma parti di programa Aruba Limpi. E proyecto ta resultado di cooperacion entre Gobierno di Aruba, Aruba Tourism Authority (ATA), Ministerio di Turismo y Ecotech Aruba N.V..

Durante e inauguracion oficial na Barcadera, Prome Minister Mike Eman a enfatisa cu un Aruba limpi ta responsabilidad di tur ciudadano. Segun dje, hopi famia enfrenta dificultad y gasto adicional pa deshaci di sushi y desperdicio grandi, y cu e facilidad nobo ta ofrece un solucion practico y accesibel.

“Cu iniciativa aki nos ta crea un solucion practico cu ta contribui na dignidad y calidad di bida di nos pueblo,” Eman a declara.

E proyecto ta sigui riba exito di diferente edicion di “Baki den Bario”, unda comunidadnan a demonstra nan deseo pa contribui na un entorno mas limpi y sigur. Segun gobierno, Zona di Desperdicio lo yuda reduci sushi ilegal y mehora aspecto di bario y comunidad.

Durante e ceremonia, Prome Minister Mike Eman, minister Wendrick Cicilia y CEO di ATA, Ronella Croes, a habri oficialmente e facilidad cu un acto simbolico.

Gobierno ta spera pa eventualmente tin por lo menos seis di e facilidadnan aki repartí riba Aruba como parti di un plan mas amplio pa fortalece sostenibilidad, salubridad y calidad di bida riba isla.