Wever: Fondo di inversion AIOF awor ta realidad pa financia proyectonan importante

ORANJESTAD – Gobierno AVP-FUTURO a anuncia oficialmente diaranson atardi, cu Aruba awor tin su propio Fondo General di Inversion y Desaroyo (AIOF). Un total di 11 parlamentario a vota pa e ley pasa. Segun Minister di Finansa, Geoffrey Wever, e fondo aki lo yuda financia proyectonan importante cu ta contribui na bienestar y desaroyo di Aruba a largo plaso.

FONDO ALIMENTA PA ARUBA, HULANDA Y  UNION EUROPEO  

E fondo ta wordo alimenta cu placa for di Presupuesto di Pais Aruba y tambe por ricibi aporte for di otro organisacionnan manera Hulanda y Union Europeo. Meta principal di AIOF ta pa crea un sistema estructural pa financia proyectonan importante pa futuro di Aruba.

INVERSION DEN VARIOS SECTOR DI ARUBA 

Segun gobierno, e fondo lo enfoca riba inversionnan den area manera enseñanza, vivienda, infrastructura, energia renobabel, adaptacion na cambio climatico y renobacion urbano. Tambe lo tin espacio pa impulsa sectornan economico nobo manera agricultura comercial, FINTECH, industria creativo y economia blauw.

MINISTER TA PRESENTA PROYECTO PA FINANCIA

Cada minister por presenta proyectonan pa wordo considera pa financiamiento. Promer cu un proyecto ricibi placa, un Comision di Evaluacion di Inversionnan lo analiza y evalua si e proyecto ta importante, realisabel y si e ta cuadra cu e metanan di gobierno. Gobierno ta enfatisa cu e fondo lo wordo maneha cu controlnan estricto. Parlamento lo sigui ricibi informacion regular tocante entradanan y gastonan di e fondo. Ademas, cada aña lo tin raportnan financiero y despues di cinco aña un evaluacion completo lo wordo haci pa determina si e fondo ta logra e resultadonan spera.

TRAYECTO LEGAL LARGO 

Minister Wever a indica cu despues di un  trayecto legal largo, Aruba finalmente a logra crea un instrumento financiero permanente cu lo permiti gobierno inverti den proyectonan importante pa beneficio di pueblo, no solamente awe, pero tambe den futuro. Segun gobierno, AIOF ta un paso importante pa fortalece desaroyo economico y social di Aruba durante e añanan cu ta bini.