SETAR ta lansa “Sali Conecta” y prepara Aruba pa futuro digital cu 5G

(ADVERTORIAL)

ORANJESTAD - SETAR ta prepara pa lansa un servicio nobo nombra “Sali Conecta”, un solucion cu lo permiti cliente haya internet na cas mesora sin mester warda largo pa instalacion tradicional.

Segun director di SETAR, Roland Croes, internet a bira algo indispensable den bida diario y desarrollo economico. “Aworaki internet ta asina importante pa existencia di un persona of un pais,” Croes a declara.

E servicio nobo ta usa red 4G LTE y futuro red 5G di SETAR pa ofrece conexion wireless directo na cas via un box special cu cliente por hiba mes ora ora nan pidi servicio. Croes a splica cu e sistema ta crea pa evita cu cliente mester warda simannan pa internet na cas.

“Nos no kier laga un cliente warda pa internet na cas. E meta ta pa cliente sali conecta mes ora,” Croes a bisa.

Cu “Sali Conecta”, e cliente lo haya un aparato cu nan por conecta na cas inmediatamente pa haya internet di  velocidad halto. Ora conexion permanente via fiber of cable ta cla, SETAR lo recupera e aparato pa reutilis’e cu otro cliente.

Croes a enfatisa cu SETAR a inverti hopi den ultimo añanan pa amplia coverage y fortalece e calidad di red na Aruba. “Nos ta traha tur dia pa pone mas cobertura y pa tur hende por haya un tremendo servicio unda cu nan ta,” e la comenta.

E director tambe a confirma cu e servicio ta corre riba tecnologia 5G y ta ofrece velocidad y calidad hopi cerca di internet tradicional via cable. Segun e, e innovacion ta parti di vision di SETAR pa mantene Aruba conecta y prepara pa futuro digital.