Mas cu 225 participante na prome conferencia grandi di cyber seguridad na Aruba

ORANJESTAD - Mas cu 225 persona a participa den e prome edicion di Dutch Caribbean Cyber Conference na Hilton Aruba Caribbean Resort & Casino, un evento enfoca riba cyber seguridad, cybercriminalidad y riesgo digital.

E conferencia, organiza dia 28 di mei, a reuni experto local y internacional pa comparti conocemento, discuti solucion practico y fortalece resistencia digital den region Caribe. Segun organizadornan, e evento a logra crea mas conciencia tocante peligro cybernetico y importancia di proteccion digital.

Durante e dia, participante di diferente sector a intercambia experiencia y a establece contacto nobo den campo di cyber seguridad. E organizacion a describi e prome edicion como un exito grandi.

E atencion awor ta move pa Willemstad, unda lo tin un segundo edicion dia 4 di juni na Centrale Bank van Curaçao en Sint-Maarten. E conferencia na Corsou lo ta mas amplio, cu presentacion di varios experto internacional tocante phishing, privacidad di data, cybercriminalidad y impacto di incidente digital riba organisacionnan.

Entre e expositornan confirma tin Daniel Yung, Dave Maasland di ESET, Tim Murck di HackShield Future Cyber Heroes, Caetano Kluyver di CyberVade y René Poot di Justspark.