A.T.A. durante reunion global di mercadeo, a enfoca riba turismo responsabel y futuro sostenible pa Aruba

ORANJESTAD – Aruba Tourism Authority (A.T.A.) a reuni su ekiponan internacional y local durante su Global Marketing Meeting 2026, cu enfoke principal riba futuro di turismo responsabel y sostenible pa Aruba.

Durante e reunion strategico di dos dia, representantenan di Europa, Latino America, Estados Unidos y Aruba a dialoga riba prioridadnan y strategianan cu lo guia promocion y desaroyo turistico di Aruba den añanan benidero.

Un di e tema principal tabata e enfoque creciente riba turismo responsabel. A.T.A. a destaca diferente campaña internacional manera “When You Love Aruba, It Loves You Back” y “Cuando Amas Aruba, Aruba Te Ama”, cu ta busca educa bishitantenan pa trata Aruba cu mas respet y consciencia.

Localmente, A.T.A. ta continua promoviendo iniciativa manera BanSerio y Aruba Limpi, enfoca riba conscientisacion comunitario, sostenibilidad y proteccion di medio ambiente.

Durante e encuentro tambe a discuti colaboracionnan cu partnernan local manera Aruba Conservation Foundation, Comite Olimpico Arubano y institutonan educacional, enfatizando cu bienestar di comunidad ta conecta directamente cu calidad di turismo.

Ademas, ekiponan internacional di A.T.A. a presenta proyeccionnan y oportunidadnan pa 2026 y 2027, cu discusionnan enfoca riba crecimiento, innovacion y direccion futuro di sector turistico.

Segun A.T.A., e reunion a confirma cu turismo sostenible ta un responsabilidad comparti entre gobierno, sector turistico y comunidad, cu meta di mantene Aruba “dushi pa biba y dushi pa bishita”.