Todd Dandaré ta destaca balor di idioma y cultura Caribeño na Cabo Verde

PRAIA – E linguista y Papiamentista Riohachero-Arubiano Ramon Todd Dandaré a participa recientemente den e “Encontro Internacional da Crioulidade Atlântica” na Praia, despues di ricibi un invitacion oficial di Presidencia di Cabo Verde.

Durante e conferencia internacional, cu a conta cu presencia di José Maria Neves y diferente representante di politica, cultura y enseñansa, Todd Dandaré a participa den un panel academico na Universidad de Cabo Verde, representando Aruba y La Guajira.

Den su presentacion, e linguista a pone enfasis riba e gran rikesa cultural y linguistico di Caribe, destacando importancia di proteha y conserva lenganan Amerindio y creole. E la haci tambe un apelacion pa mantene  e tradicion oral y memoria colectivo di e pueblonan Caribeño bibo.

E encuentro internacional tabata enfoca riba identidad cultural, diaspora Atlantico, diversidad y convivencia multicultural. Todd Dandaré tambe a presenta e revista multicultural y multilingual SER Caribe, di cual e ta miembro honorario di e conseho editorial.

Recientemente, e linguista a ricibi un homenahe especial durante e encuentro “Mma Pe’ipaasü” na Riohacha, den conmemoracion di 200 aña di relacion diplomatico entre Reino Hulandes y Colombia.