Estudio ta confirma cu independencia total di cuminda no ta realista pa islanan den Caribe

WILLEMSTAD/ORANJESTAD  – Un estudio nobo ta mustra cu independencia total di cuminda pa e seis islanan Caribe di Reino Hulandes practicamente no ta realista. E investigacion ta indica cu e problema principal no ta falta di agricultura local, sino limitacion di espacio, awa y energia riba e islanan.

Segun e informe, Aruba actualmente ta usa solamente cerca 34 hectare di tereno pa produccion di cuminda, cu ta apenas 0,19% di superficie total di isla. Boneiru ta usa ainda menos espacio pa agricultura.

E investigadornan ta bisa cu agricultura moderno manera hidroponics y produccion controla pa clima ta necesita hopi electricidad, awa y infrastructura, loke ta haci expansion mas dificil y costoso.

E estudio a haci calculacionnan teorico pa mira cuanto tereno mester pa logra independencia total di cuminda. Pa Aruba, lo mester casi 690 kilometro cuadra di tereno agricola, cu ta casi cuater biaha e tamaño total di Aruba. Produccion di carni ta resulta e area cu ta usa mas espacio.

Segun e informe, e discusion awor no ta solamente si islanan por produci mas localmente, pero mas bien unda y den cua producto produccion local ta realmente posible y eficiente.

E investigadornan ta mira mas oportunidad den berdura, bladgroenten, webo y cierto tipo di piscamento. Pa carni y lacteo, e limitacionnan di espacio y recurso ta bira muchisimo mas evidente.

Aruba, por ehempo, ta enfoca riba produccion specialisa manera champignon y berdura hidroponico, mientras cu Corsou tin e perfil agricola mas amplio di tur e islanan, aunque ainda mas cu 91% di cuminda aya ta bin di importacion.

E estudio tambe ta enfatisa cu importacion lo sigui ta e base principal di suministro di cuminda pa e islanan. Sin embargo, produccion local por yuda crea un buffer extra, mas estabilidad y menos dependencia durante problema den transporte y logistica internacional.

Segun e investigacion, e mayoria di e islanan tin solamente algun dia di reserva di cuminda disponible si importacion para completamente, loke ta haci agricultura local strategicamente importante, aunke e nunca lo por reemplasa importacion completamente.