Otro siman Corte Superior lo trata apelacion den caso Flamingo

ORANJESTAD - Caso Flamingo lo drenta un fase importante otro siman, ora cu Corte Superior cuminsa trata e apelacion den e caso cu ta envolve ex-minister Otmar Oduber, Richinella Wever y Eisia Esser. E tratamento ta cuminsa dia 1 di juni y lo sigui te cu 5 di juni 2026.

Ministerio Publico y diferente abogado defensor a presenta nan apelacion despues cu Corte anteriormente a declara Oduber y Wever culpabel di varios delito relaciona cu abuso di funcion, falsificacion y malversacion, mientras cu Esser a keda liber di castigo.

Fiscal a pidi castigonan pisa, incluyendo multa, trabou comunitario y sentencianan di prizon. Den caso di Oduber, Fiscal ta busca un castigo mas severo, alegando cu e a usa su posicion como minister pa beneficia otro hende y causa dano na confianza publico den gobierno.

Corte anteriormente a conclui cu tabatin indicacion di abuso di poder y trato preferencial den asunto di dunamento di terreno, particularmente den caso relaciona cu Malmok. Segun e sentencia anterior, Wever tabata involvi den proceso administrativo y a participa den decisionnan cu no tabata sigui e proceduranan normal.

Pa loke ta Eisia Esser, Corte anteriormente a determina cu no tabatin suficiente prueba pa comproba cu e a ricibi regalo of beneficio ilegal. Esser a keda liber di e acusacionnan.

Den e apelacion, e tres acusadonan lo haya oportunidad pa presenta nan defensa otro biaha, mientras cu Corte Superior lo reevalua e prueba y e sentencianan anterior. Despues di e tratamiento, Corte lo determina si e condenanan anterior ta keda na vigor, ta wordo cambia of si tin liberacion adicional