Departamento di Impuesto a procesa mas cu 62 mil obhecion fiscal

ORANJESTAD – Departamento di Impuesto di Aruba a logra elimina un atraso administrativo enorme despues di procesa mas cu 62.000 obhecion fiscal. Esaki ta sali for di e Agenda y Raportahe di Ehecucion 2026 di Aruba y Hulanda.

Segun e documento oficial, e operacion di recuperacion ta forma parti di e reforma y modernisacion mas amplio di Departamento di Impuesto dentro di e asina yama “Landspakket”. Aruba ta trahando hunto cu Hulanda pa fortalece e organizacion fiscal, mehora proceduranan y modernisa supervision y control fiscal.

E maneho di e miles di obhecionnan ta wordo considera como un di e resultado concreto mas grandi dentro di e trayecto di reforma fiscal te awor. Durante hopi tempo, e atraso den proceduranan di obhecion tabata un problema serio dentro di administracion di impuesto.

Ademas di limpia e atraso administrativo, gobierno tambe ta sigui traha riba profesionalisacion di investigacion fiscal. Segun e agenda di ehecucion, e servicio fiscal di inteligencia y investigacion FIOT lo sigui ricibi apoyo di FIOD hulandes den investigacionnan relaciona cu fraude fiscal.

Aruba y Hulanda tambe ta trahando riba reglanan fiscal nobo entre ambos pais. Segun e reportahe, pa gran parti di e acuerdo ya tin consenso. Solamente riba e tratamento fiscal di artista y deportistanan ainda tin conversacionnan pendiente.