Joia Aruba at Iberostar ta impulsa economia circular cu proyecto di reciclaje y compost

ORANJESTAD – Diferente hotel na Aruba ta sigui fortaleciendo nan compromiso cu sostenibilidad pa medio di proyectonan enfoca riba reciclaje, reduccion di desperdicio y economia circular. Durante un reciente presentacion di staff di Joia Aruba by Iberostar diamars mainta, representante di e iniciativa 3R y Compost Alliance a comparti con nan ta transformando desperdicio den recurso util pa comunidad y medio ambiente.

Segun Stefanie, manager di departamento 3R, e nomber 3R ta representa “Reduce, Reuse & Recycle” e la splica cu nan hotel ta unico na Aruba cu un departamento dedica completamente na maneho di desperdicio y sostenibilidad.

E sistema ta traha cu tres diferente categoria di desperdicio: desperdicio organico, desperdicio general y materialnan reciclable. Desperdicio organico no ta bai landfill ni Ecotech, sino ta wordo reutilisa pa alimenta porconan na un granja local como parti di e proyecto Compost Alliance. Segun e presentacion, e concepto ta crea un ciclo circular unda resto di comida eventualmente ta contribui na produccion di alimento nobo.

Ademas, hotelnan participante ta recicla aluminio, glas y plastico den colaboracion cu diferente organisacion local. Glas ta wordo kibra y reutilisa pa sandblasting, mientras plastico ta wordo procesa cu apoyo di fundacionnan ambiental manera Plastic Beach Party y Met Wall Foundation.

Otro materialnan manera carbon, y casca di webo tambe ta wordo reutilisa pa produccion di compost y proyectonan agricola local. Segun e organisadornan, e iniciativa no solamente ta reduci desperdicio, pero tambe ta contribui na un modelo economico mas circular y sostenibel pa Aruba.