Wardacosta y piscadornan ta rescata boto cu tabata hundiendo na lama

ORANJESTAD - Den oranan di dialuna mainta, Centro Operacional Maritimo di Guardacosta Caribisch Gebied a capta un mensahe di emergencia via canal VHF 16. Tabata trata di un boto charter cu cinco persona abordo cu tabata pidiendo asistencia riba laman. E boto tabata nabegando den awa nan di Aruba ora cu, di un momento pa otro, awa a cuminsa drenta den e boto. Inmediatamente a manda e helicopter di Wardacosta pa monitor e situacion, mientras dos unidad di Metal Shark a sali for di Savaneta pa brinda asistencia.

Diferente boto di piscado den e area tambe a tende e yamada di emergencia riba canal 16 y nan a bay den direccion di e boto pa yuda. Hunto cu e unidadnan di Metal Shark y e botonan den cercania, a logra acompaña e boto cu problema te cu e la yega salvo na pier di Renaissance Marina.

Wardacosta a expresa agradecimento na tur boto cu a brinda asistencia durante e operacion di rescate. Segun nan, e accion aki ta demonstra con comunidad maritimo, trahando hunto, por contribui na mas seguridad riba laman.