Debe di Aruba ta sigui baha te casi 5 biyon florin

ORANJESTAD – E debe total di gobierno di Aruba a sigui baha y na cuminsamento di 2026 e la yega casi cinco biyon florin. Esaki ta sali for di cifra nobo di Centrale Bank van Aruba. Segun e tabla tocante debe gubernamental pendiente, e debe total a baha for di mas cu 5,7 biyon na 2022 pa mas cu 5,1 biyon na final di 2025. Den prome kwartaal di 2026, e debe a baha ainda mas te casi 5 biyon florin. Specialmente e debe exterior a baha fuerte durante e añanan pasa. E cantidad aki a cay for di mas cu 3,5 biyon na 2022 pa casi 2,9 biyon na cuminsamento di e aña aki. Ta notable cu  specialmente e debe cu Hulanda a wordo reduci, pasando for di casi 1,45 biyon pa alrededor di 1,25 biyon florin. Tambe e debe cu Merca a baha for di mas cu 800 miyon pa aproximadamente 720 miyon florin.

OBLIGACIONNAN GUBERNAMENTAL

En cambio, e debe local a keda relativamente  stabile na alrededor di dos biyon florin. Den e categoria aki, ta destaca cu Aruba cada vez mas ta financia su mes pa medio di obligacionnan gubernamental local. E balor di obligacionnan gubernamental pendiente a subi den añanan reciente te casi 1,6 biyon florin. Na mes momento, debe di corto plazo a baha considerablemente. Esey ta indica cu gobierno ta bira menos dependiente di financiamiento temporal y obligacionnan di pago pendiente.

GARANTIANAN DI GOBIERNO

Banco Central ta indica cu e cifranan no ta inclui garantianan pendiente di gobierno. Ademas, debe exterior ta wordo calcula usando tipo di cambio actual. Segun splicacion historico di e cifranan, cifra di debe mas bieu  entre 1992 y 2003 anteriormente a wordo ahusta debido na debe cu gobierno a tuma over relaciona cu garantianan pa hotelnan. Cu esey, Banco Central indirectamente ta referi na e riesgonan financiero cu Aruba tabata corre den pasado door di apoyo na sector turistico.