Corte: Gobierno no por confisca stepnan electrico sin sigui procedura legal

ORANJESTAD – Corte a pronuncia awe den dos caso di hucio sumario presenta door di companianan cu ta huur stepnan electrico contra Pais Aruba. E veredicto ta confirma cu Gobierno no por sigui confisca e stepnan sin prome sigui e proceduranan stipula den ley.

CONFISCA STEP ABRUPTAMENTE

Tur esaki a cuminsa despues cu Minister di Husticia Arthur Dowers a anuncia dia 21 di april 2026 cu uso di stepnan electrico riba caminda publico tabata prohibi cu efecto inmediato. Poco dia despues, dia 29 di april, e minister a publica un “Ultimo Aviso” riba social media, y dia siguiente, 30 di april, autoridadnan a cuminsa carga y hiba varios stepnan.

ORDEN TEMPORARIO

E verhuurdernan di e stepnan a acudi na Corte pidiendo un orden pa Gobierno stop cu confiscacion di e vehiculonan. Na su turno, Pais Aruba a presenta un contrademanda, pidiendo cu e companianan kita tur stepnan y stacionnan di carga for di tereno publico.

SENTENCIA

Den su decision, Corte a conclui cu, pa awor, Pais Aruba no mag di confisca e stepnan. Segun Corte, si Gobierno kier tuma medida contra e stepnan, e proceso mester wordo ehecuta cuidadosamente y conforme ley. Esaki ta inclui: manda un notificacion oficial na e huurdonan, splicando claramente dicon nan ta actuando contra ley, cua  ley ta aplica, cua accion nan mester tuma y dentro di cual plazo. Segun Corte, Gobierno no a sigui e procedura aki den e caso actual. Ademas, Corte a determina cu e companianan no ta obliga, pa awor, pa kita e stepnan y stacionnan di carga for di caminda publico. Corte a indica cu Gobierno mester prome solicita formalmente cu e propiedadnan wordo kita dentro di un termino razonabel.

ADVERTENCIA PA HUURDONAN DI STEP 

Sinembargo, Corte a aclara cu e decision no ta nifica cu stepnan electrico por keda indefinidamente riba caminda publico. E verhuurders y conductornan mester sigui respeta  e reglanan vigente. E veredicto simplemente ta indica cu Pais Aruba no por confisca e stepnan sin sigui e proceduranan legal correcto.