Hof ta bolbe pospone apelacion di reportero Nelson 'Speed' de Andrade

ORANJESTAD – Hof a dicidi pa atrobe pospone e caso di apelacion contra Nelson Speed de Andrade, despues cu su abogadonan nobo a pidi mas tempo pa prepara nan defensa. E audiencia, cu originalmente tabata planea pa diahuebs mainta, awor lo sigui riba 26 di october 2026.

E caso aki ta relaciona cu e condena cu de Andrade a ricibi na december 2024, den cual tribunal a haya cu e , hunto cu otro implicadonan, a participa den corrupcion y abuso di informacion secreto di polis.

Den e sentencia original, Hues a declara cu no tabatin suficiente prueba pa comproba cu tabatin un organizacion criminal, y pa motibo ey, algun acusadonan a wordo absolvi di e acusacion  specifico ey. Sinembargo, tribunal si a conclui cu e tres reporteronan Andrade, Giel y Laclé a actua den contra di nan deber como reportero usa un agente di polis door di comparti informacion confidencial.

Segun corte, e acusadonan a haya ayudo tecnico, incluyendo laptop, Wi-Fi y aplicacionnan pa retransmiti comunicacionnan di Tetra-radio di polis. Hues a considera cu esaki a pone informacion secreto den man di persona no autorisa y a crea un situacion peligroso pa comunidad y pa imagen di cuerpo policial.

Corte tambe a subraya cu libertad di prensa tin limite determina pa ley y cu den e caso aki no tabata trata simplemente di periodismo, sino di posible uso ilegal di informacion confidencial.

Na momento di sentencia, Andrate a ricibi 18 luna castigo di prizon, di cual 12 luna tabata condicional cu un periodo di prueba di tres aña. Segun Hues, e castigo tabata mas severo pasobra e delitonan a wordo comete durante su periodo di prueba pa un caso anterior.

Awor cu e apelacion a wordo pospone, tres huez lo revisa e caso den october pa determina si e condena y castigo original lo keda na vigor of si tin cambio den decision final.