Ludwich Samson ta subi te Executive Chef di Joia Aruba by Iberostar: “Hard work pays off”

(ADVERTORIAL)

ORANJESTAD – Despues di apenas seis luna den funcion como executive sous chef di Joia Aruba by Iberostar, chef local Ludwich Samson awor oficialmente a wordo promovi pa posicion di Executive Chef di e hotel prestigioso. Un logro cu e mes ta describi como resultado di hopi trabou duro, dedicacion y conexion cu su equipo di trabou.

Den un entrevista reciente, Samson a relata con su trayectoria den cocina profesional a hib’e te e importante paso aki den su carrera. “Mi a cuminsa seis luna pasa como executive sous chef. Hopi hard work, hopi dedicacion, connect cu e staff, cu ta hopi importante, y e oportunidad a presenta y mi a wordo scogi pa e posicion di executive chef,” Samson a declara.

Segun e chef local, e cambio di posicion ta trece cu ne mucho mas responsabilidad. Mientras como executive sous chef e tabata concentra principalmente riba diferente parti operacional di cushina, awor e peso completo di operacion ta riba su lomba. “Como executive sous chef, tin parti di e operation cu mi tabata encarga cu dje. Mi tabata mas operational y hopi tur caminda basicamente. Pero awor, e responsabilidad completo di e operation ta cai riba e Executive Chef,” Samson a splica.

Un aspecto cu Samson ta considera  specialmente significativo ta e hecho cu un talento local a haya e oportunidad pa ocupa e posicion mas halto den cushina. Segun  e, hopi biaha posicionnan manera Executive Chef ta wordo ocupa pa chefnan extranhero, pero den e caso aki a wordo scogi un profesional local. “E hecho cu bo ta (un) local den funcion tambe ta importante, pasobra hopi biaha Executive Chef ta hende di afo, pero aki nan a scoge un persona local,” Samson a expresa cu orguyo. Ora cu a wordo pregunta con e ta sinti cu su reciente promocion, Samson no a duda pa expresa su emocion. “Orgulloso, zoiezo… y como mi ta bisa: hard work pays off.”

Promocion di Samson ta wordo mira como un ehempel positivo di crecimiento profesional y reconocimiento di talento local den industria gastronomico na Aruba.