Carta anonimo ta acusa conflicto di interes relaciona cu bishita di Rey

ORANJESTAD – Un carta anonimo manda na Parlamento di Aruba ta acusa supuesto irregularidadnan, conflicto di interes y posible favorecimento financiero durante preparacion di celebracion di 18 di maart y bishita oficial di Rey Willem-Alexander na Aruba na maart 2026.

Segun e documento, un comision encarga cu organizacion di e actividadnan a originalmente contacta musico profesional Carlos Bislip pa forma y dirigi un orkesta pa e celebracion. E carta ta alegando cu despues di entrega di un presupuesto oficial, e propuesta di Bislip a wordo rechaza pasobra e costo tabata considera muchu halto.

Despues di esey, segun e acusacion, un miembro di e comision lo a entrega un presupuesto alternativo den nomber di su casa, cu un costo mas abou, y cu finalmente e propuesta aki a wordo aproba. E carta ta argumenta cu esaki por representa conflicto di interes y apariencia di enriquecemento propio dentro di un proceso cu mester tabata transparente y independiente.

Den e documento tambe ta alegando cu Prome Minister Mike Eman lo tabata na altura di e situacion despues di ricibi diferente comunicacion y reclamacion oficial, pero cu segun autor di e carta, no a wordo tuma accion suficiente pa investiga e asunto independientemente.

E carta ta pidi pa un investigacion profundo y independiente riba e alegacionnan, señalando cu e asunto por tin implicacionnan administrativo, politico y posiblemente penal si algun irregularidad lo wordo comproba. Tambe ta argumenta cu confianza den gobernacion publico y integridad di proceso di decision mester wordo proteha.

Te awor, gobierno no a anuncia oficialmente ningun reaccion amplio riba contenido di e documento anonimo.

REACCION BISLIP

 Carlos Bislip entretanto a distancia su mes completamente di e denuncia. Segun e , su nomber ta wordo usa den un asunto cu no tin relacion cu ne. “Mi ta refuta cualkier idea cu mi lo ta envolvi den esaki,” Bislip a bisa. E  tambe a laga cla  cu no kier wordo mira como “ningun hende su speelbal politico.”