KPA ta ricibi K9 Carla como refuerzo nobo pa seguridad na Aruba

ORANJESTAD - Cuerpo Policial Aruba a ricibi un colega nobo pa Unidad di K-9: e cacho policial Carla, como donacion di Irondog K9 International. Carla ta e di tres cacho cu e organisacion a dona na KPA como parti di un relacion di cooperacion cu ta dura varios aña.

Ademas di donacion di cachonan, Irondog K9 International tambe a brinda sosten cu equipo, entrenamento y seminarionan pa agentenan policial di Aruba.

E entrega oficial a tuma lugar den presencia di fundador Charlie Nash, CFO Mitzi Nash y personal di Unidad K-9, incluyendo altocomisario Ramon Arnhem, kende a expresa agradecimento pa e apoyo continuo.

KPA a yama bon bini na K9 Carla y a destaca cu e lo contribui na fortalecemento di seguridad den comunidad Arubiano.