WOW Aruba ta inspira comunidad cu conferencia “Lead Your Legacy”

ORANJESTAD - WOW Aruba lo organisa su di cuatro conferencia anual dia 30 di mei cu tema “Lead Your Legacy”, un evento enfoca riba liderazgo personal, crecemento y empoderamento. Despues di exito di conferencianan anterior manera “Dare to Be”, “Becoming a Braver You” y “The Power Within”, WOW Aruba ta busca inspira comunidad un biaha mas cu diferente orador internacional y local.

Conferencia lo gira rond di cuatro pilar principal: lidera cu vision, disciplina, curashi y creatividad. Corina Curatola lo papia riba liderazgo cu vision; Dr. Jasmira Wiersma riba disciplina y empoderamento financiero; Kimberly Maduro riba resiliencia emocional y curashi; mientras cu Tarrick Ras lo enfoca riba creatividad y influencia positivo.

Segun presidenta di WOW Aruba, Giancarla Lobbrecht, e conferencia ta representa transicion, reconocemento propio y e importancia di lidera bo propio bida. Aunque WOW Aruba ta principalmente un organisacion pa empoderamento di muhernan, e conferencia ta habri pa tur hende interesa den desaroyo personal