Crucero Hondius a yega Rotterdam pa cuarentena y limpieza despues di brote mortal di hantavirus

ROTTERDAM - E crucero hulandes MV Hondius, cu recientemente tabata afecta pa un brote di hantavirus, a yega  Rotterdam, Hulanda bek. E barco a drenta den haf cu ta sirbi como haf oficial di cuarentena pa Hulanda, unda lo wordo haci un limpieza profundo y desinfeccion completo.

Na haf, 23 unidadnan di estadia temporario ta cla pa acomoda tripulantenan stranhero durante nan cuarentena di seis siman, den caso cu nan no por wordo repatria. E tripulacion ta consisti principalmente di hende for di Filipinas, Ucrania, Rusia y Polonia. Dos miembro di tripulacion hulandes lo pasa nan cuarentena na cas.

Tur persona abordo lo wordo getest un biaha mas. Actualmente ningun tripulante no tin sintoma, pero curpa di un pasahero aleman cu a fayece recientemente ainda ta abordo.

Despues cu tur tripulacion baha for di barco, un limpieza intensivo lo cuminsa. Specialistanan den desinfeccion lo limpia y desinfecta tur area di e crucero, incluyendo cabinanan, restaurant, cushina y espacionan recreativo, uzando producto a base di peroxide di hidrogeno y cloro. Lugarnan manera buffet, bar y recepcion ta wordo considera area di mayor riesgo.

E brote di Andesvirus – un variante peligroso di hantavirus – a cuminsa na final di april mientras cu e barco tabata navegando cu aproximadamente 150 pasahero y tripulante di casi 30 pais diferente. Tres persona, incluyendo un pareja hulandes y un dama aleman, a perde nan bida.

Un siman pasa, aproximadamente 150 pasahero a wordo evacua na Islanan Canario y poni den cuarentena. Segun Organisacion Mundial di Salud (WHO), te 13 di mei tabatin 11 caso reporta, incluyendo e tres morto.

Hantavirus normalmente ta plama door contacto cu excremento di ratonan y djaka, y solamente por transmiti entre hende despues di contacto cercano y prolonga, diferente di coronavirus.