AMMF: Dolfijn Charlie ta sigui recuperando na Aruba

ORANJESTAD – Aruba Marine Mammal Foundation a confirma diabierna cu e dolfijn cu recientemente a crea hopi preocupacion y  speculacion den comunidad, ainda ta bibo y ta sigui den proceso di recuperacion y alimentacion.

Den un comunicado oficial, e fundacion a indica cu desde dialuna, rescatistanan y boluntarionan ta trahando 24 ora pa dia pa duna e animal e mihor oportunidad posible pa recupera. Segun AMMF, diferente reaccion y comentario insensitivo rond di e situacion ta causando dolor na esnan cu ta dedica nan tempo, energia y cuido na e operacion di rescate.

E fundacion tambe a enfatisa cu e situacion no mester wordo trata como un atraccion of oportunidad pa saca portret. Specialmente, nan ta pidi boto y jetskinan pa mantene distancia y laga e area tranquilo pa facilita recuperacion di e dolphin.

“Tur update oficial lo bin directamente for di Aruba Marine Mammal Foundation,” e comunicado a indica, mientras cu organizacion a gradici comunidad pa e compasion, respet  y apoyo demonstra durante e operacion.