813 coredor lo conkista Aruba awe nochi durante e historico 34 edicion di Ronde van Aruba

SAVANETA – E ambiente na Marinierskazerne Savaneta tabata yen di emocion, tension y orguyo durante briefing oficial di e 34 edicion di e famoso Ronde van Aruba, unda oficialmente a confirma cu no menos cu 813 participante lo reta nan curpa y mente den e agotador careda di 72 kilometer rond di Aruba. E evento, cu durante decenionan a bira uno di e competencianan di resistencia mas iconico di Caribe Hulandes, lo wordo cori awe diabierna 15 di mei y sigui te mainta dia siguiente. E careda, cu ta cubri practicamente henter perimeter di Aruba, ta combina resistencia fisico, disciplina mental y trabao di ekipo den un reto unico cu cada aña ta atrae mas corredor local y internacional.

Durante briefing, organizacion a revela e impresionante cifranan pa edicion 2026:

23 participante individual (“single”) lo intenta completa henter e 72 kilometer nan so.

63 duo lo comparti e distancia den pareha.

166 ekipo di estafete lo participa den formato di relevo.

Esaki ta pone e cantidad total di participante na mas cu 813 persona, convirtiendo edicion 2026 den uno di e mas grandi den historia reciente di e evento.

NO SIMPLEMENTE UN CAREDA 

Ronde van Aruba no ta simplemente un careda. Pa hopi Arubiano, e ta un tradicion, un ritual deportivo y un simbolo di perseverancia. E evento a logra crea un reputacion internacional pa Aruba den mundo di ultra-running, precisamente pasobra e ta ofrece algo cu casi ningun otro competencia por ofrece: core rond di un pais completo den un solo anochi.

Den añanan pasa, miles di coredor a pasa door di calor, biento fuerte,  scuridad y agotamento extremo pa cruza nan meta. Y cada edicion ta trece su mes historia di sacrificio, emocion y victoria personal.

Organisadornan a enfatisa durante briefing cu seguridad, hidratacion y coordinacion logistico ta bira aun mas importante mirando e crecemiento continuo di e evento. Diferente boluntario, cuerpo di seguridad y personal medico lo ta desplega rond di isla pa garantiza cu e careda ta transcuri den forma sigur y organiza.

Mientras Aruba ta sigui desaroyando su reputacion como destino deportivo internacional, e di 34 edicion di Ronde van Aruba ta confirma un cos: e espirito competitivo y determinacion di Aruba ta mas bibo cu nunca.