Aruba ta revoca permiso di buelo di aeroliña charter Bestfly: Compania ta bisa cu nan mes a pidi esey

ORANJESTAD – Departamento di Aviacion Civil di Aruba (DCAA) a revoca e Air Operator Certificate (AOC) di Bestfly, despues di accionnan regulatorionan cu, segun autoridadnan, a wordo tuma den interes di seguridad di aviacion y supervision di cumplimiento.

Segun un comunicado di DCAA, e permiso inicialmente a wordo suspendi dia 5 di mei mientras cu tabata tin un revision regulatorio adicional. Despues di mas evaluacion, e certificado oficialmente a wordo revoca dia 11 di mei.

Sinembargo, fundadornan di Bestfly, Nuno y Alcinda Pereira, a declara cu compania mes a tuma e decision pa para operacionnan di AOC na Aruba y a solicita gobierno pa retira e certificado.

“Bestfly kier informa su clientenan y asociadonan cu, despues di un periodo di evaluacion, nan a dicidi pa stop operacionnan di AOC na Aruba,” e comunicado di compania a bisa. Segun Bestfly, dia 8 di mei nan a informa minister di Transporte tocante e decision y a pidi oficialmente pa retira e AOC, algo cu a wordo aproba dia 11 di mei.

DCAA a indica cu algun aeronavenan cu anteriormente tabata opera bao OPS-1, awor a wordo transferi pa operacionnan OPS-2.

Autoridad di aviacion a enfatisa cu e accionnan tuma ta mustra compromiso di Aruba cu e mas haltu standardnan di seguridad di aviacion, supervision operacional y cumplimiento regulatorio conforme standardnan internacional.

Bestfly ta un operador Angoleño funda na 2009 cu ta ofrece servicio di charter, mantenimiento y maneho di avionnan. E division Arubiano di compania a wordo establece na 2017 na Oranjestad y tabata registra un avion Embraer 190 pa vuelonan entre Aruba, Boneiru y Corsou.