Miguel Mansur ta cuestiona “show” politico y falta di solucion structural na Aruba

ORANJESTAD - Empresario y opinionista Miguel Mansur a critica   e forma con gobierno ta presenta diferente proyecto publico fueramente, argumentando cu hopi anuncio y evento mediatico no ta ataca e problemanan structural cu Aruba tin. Segun Mansur, revitalisacion real di centro di ciudad no ta cuminsa cu camera ni cu acto simbolico manera kita klinker, sino cu solucionnan concreto y duradero.

Mansur a menciona tres problema principal cu, segun e, ta afecta centro di Oranjestad pa decada: adictonan ambulante, falta di parkeerplaats y un sistema di tram cu no ta funcional. E la indica cu sin atende e asuntonan aki, tur intento di revitalisacion lo fracasa manera proyecto anteriornan.

Segun e analisis, gobierno mester duna prioridad na cambia leynan di curatela pa permiti tratamiento obligatorio pa adictonan grave, mirando cu proceso legislativo na Aruba ta lento. Tambe a cuestiona falta di progreso concreto tocante parkeer garage y infrastructura esencial despues di cinco aña di mandato.

Riba e sistema di tram, Mansur a bisa cu e modelo actual ta demasiado costoso y inflexible. E la propone adapta Arutram pa un sistema mas similar na trolleynan moderno cu por usa caminda regular, permitiendo habri Caya Grandi bek pa trafico y amplia transporte pa otro area di ciudad.

Mansur tambe a critica gobierno pa, segun e, celebra proyecto simbolico manera plantamento di mata sin un plan serio di mantencion. Ademas, e la cuestiona manejo financiero di gobierno, argumentando cu aumento di pensioen y salario a bira posible danki na entrada fiscal genera den gobierno anterior, apesar cu actual lidernan anteriormente tabata critica e medidanan fiscal.

Finalmente, Mansur a expresa frustracion cu e sistema digital di impuesto ainda tin limitacionnan apesar di gasto miyonario. E la conclui cu Aruba no falta potencial, pero si falta voluntad politico pa enfrenta problema structural cu seriedad y urgencia.