Tromp-Lee(MEP): Alerta pa crisis di energia y ta cuestiona falta di plan structural di gobierno

ORANJESTAD - Parlamentario Shailiny Tromp-Lee a expresa preocupacion profundo tocante e aumento continuo den prijs di combustibel y costo di bida na Aruba, señalando cu gobierno ainda no a presenta un plan structural y concreto pa largo plazo. Entrante 13 di mei, prijs di gasolin lo subi di Afl. 2,48 pa Afl. 2,65 pa liter, mientras diesel y kerosin tambe lo subi.

PLAN DI GOBIERNO

Gobierno a anuncia cu lo mitiga parti di e aumento door di baha accijns temporalmente, absorbiendo parti di e subida pa evita un impacto mas grandi riba consumidor. E medida aki ta busca mantene prijsnan mas estable den corto plazo y proteha poder di compra di famianan. Sin embargo, Tromp-Lee ta cuestiona te cuanto tempo gobierno por sigui sostene e strategia aki sin un solucion permanente.

ARUBA EXPONI

Segun e parlamentario, documentonan oficial di WEB Aruba ta mustra cu pa 2027 Aruba lo keda completamente exponi na prijs internacional di petroleo, algo cu por resulta den aumento di tarifa di awa y coriente. Ela a indica cu 95% di consumo di zeta pa 2026 ta cubri cu hedging, pero cu no tin claridad tocante estrategia despues di esey.

TARIEFSHOCK

Tromp-Lee a manda preguntanan oficial na ministernan competente tocante posibilidad di un “tariefshock”, existencia di buffer financiero y preparacion pa eventual subida adicional den mercado mundial. Tambe a expresa preocupacion riba seguridad energetico di Aruba, mirando dependencia total di Heavy Fuel Oil y tensionnan geopolitico den Medio Oriente y Strait of Hormuz.

MITIGACION DI IMPACTO

Gobierno, di su banda, a indica anteriormente cu ta trahando riba mitigacion di impacto economico door di medida temporal manera reduccion di accijns y monitoreo continuo di mercado internacional. E discusion awo ta pone enfasis riba necesidad di un vision energetico y economico mas duradero pa Aruba, den momento cu costo di bida ta sigui creando presion riba famianan y comercionan local.