HOH ta amplia cuido medico cu prome Physician Assistant na Aruba

ORANJESTAD - Horacio Oduber Hospital (HOH) a celebra un momento historico cu graduacion di Gianina de Freijtas como e prome “Physician Assistant” (PA) na Aruba. E estudio, desaroya hunto cu HAN University of Applied Sciences, ta enfoca riba cuido directo di pashentnan y ta brinda mas oportunidad pa profesionalnan medico traha independiente y asisti specialistanan.

Gianina a completa e trayecto intensivo despues di dos aña y mey di estudio y awo ta trahando fulltime den poli di ginecologia na Horacio Oduber Hospital. Segun HOH, e funcion di Physician Assistant por yuda alivia e carga di trabou di dokternan y specialistanan, algo importante mirando e escasez mundial di personal medico.

HOH Academy a indica cu e programa ta habri porta pa mas profesionalnan cu ya tin un Bachelor den cuido pa sigui specialisa y crece den nan carera. Despues di e exito aki, hospital a confirma cu nan lo sigui ofrece oportunidadnan pa PA den cardiologia, cirugia, urologia y departamento di emergencia.

Segun coordinadornan di e estudio na Hulanda, e rol di Physician Assistant ta wordo usa ampliamente pa fortalece continuidad y calidad di cuido medico. Graduacion di Gianina ta wordo mira como un paso importante den modernisacion y innovacion di sector di salud na Aruba.