Sindicatonan via carta a pidi Parlamento para HOFA: "Autonomia ta na peliger!"

ORANJESTAD – Un grupo grandi di sindicatonan di Aruba a manda un carta fuerte na Parlamento di Aruba diamars, pidiendo pa reconsidera y hasta cancela e trayecto actual di e ley di consenso Reino HOFA, advirtiendo cu autonomia constitucional y soberania presupuestario di Aruba por wordo seriamente afecta.

Den e carta firma pa diferente sindicatonan importante di Aruba, nan ta expresa preocupacion profundo tocante e direccion cu e propuesta di ley HOFA ta tuma y nan ta bisa claramente cu e conseho reciente di Raad van Advies di Aruba ta confirma hopi di e preocupacionnan cu sindicatonan tabata ya levantando desde 2025.

Segun e sindicatonan, Raad van Advies a identifica problema constitucional fundamental den e concepto di ley, incluyendo tension entre e propuesta y principio di democracia parlamentario, y tambe posible limitacion di autonomia di Aruba riba maneho presupuestario. Nan ta argumenta cu e analisis di Raad van Advies ta confirma e riesgo pa legitimidad democratico y soberania financiero di Parlamento di Aruba.

E carta ta pone enfasis cu preocupacion principal no ta solamente tecnico-huridico, pero tocante e estructura fundamental di democracia parlamentario di Aruba. Segun sindicatonan, Parlamento como representante di pueblo no mester wordo limita den su funcion constitucional door di conseho externo adicional of estructura cu por afecta e independencia di decisionnan local.

Sindicatonan tambe ta pidi Parlamento pa tuma un posicion cla y formal riba e asunto, incluyendo un mocion cu ta determina si ainda tin consenso riba e concepto actual di HOFA manera Reino Hulandes ta proponiendo.

Nan ta aclara cu nan posicion no ta contra cooperacion dentro di Reino Hulandes ni contra supervision financiero  en si. Contrariamente, nan ta enfatisa importancia di finansa publico fuerte, transparente y sostenible. Sinembargo, nan ta opone e forma cu supervision financiero ta wordo organiza actualmente dentro di e concepto di HOFA, pasobra nan ta considera cu esaki por tin implicacionnan structural serio pa autonomia y posicion constitucional di Aruba.

Den nan conclusion, sindicatonan ta insiste cu Aruba mester considera alternativanan basa riba ley local y fortalecemento di supervision existente, cu nan ta considera mas balancea tanto juridicamente como institucionalmente.

E carta aki ta agrega ainda mas presion politico riba e debate cu ya ta creciendo rond di HOFA, especialmente despues cu Raad van Advies recientemente a expresa preocupacion serio tocante e base constitucional di e propuesta di ley di consenso dentro di Reino Hulandes. Lesa e carta AKI.