Analisis: Morto di turista ta rebiba e debate riba uso di ATV y UTV na Aruba

Scirbi pa Tito Laclé

E prome morto relaciona cu un UTV na Aruba recientemente, no por wordo trata como “djis un accidente”. E hecho cu un turista mericano di 39 aña a perde su bida cerca di Black Stone Beach (of Boca Injeco manera su nomber original ta) ta pone Aruba dilanti di un pregunta incomodo: ta ki ora libertad turistico, negoshi y aventura ta bira un riesgo cu e pais no por acepta mas?

Y si, e hecho cu e victima ta un turista ta haci e asunto ainda mas delicado y alarmante. No solamente pa e tragedia humano mes, pero pasobra Aruba ta biba di turismo. Ora un turista perde su bida den un actividad recreativo cu e pais ta promociona activamente, esaki ta crea reaccion no solamente localmente, pero tambe internacionalmente. Un morto asina ta bira noticia den otro paisnan, y automaticamente ta crea pregunta riba seguridad, supervision y responsabilidad na Aruba. Esaki ta exactamente e tipo di incidente cu por afecta reputacion di destino Aruba si no wordo maneha serio y rapidamente. Y no ta prome biaha cu algo asina ta pasa, esta cu un turista ta accidenta, y fayece. Nos tin suficiente ehempel. 

REACCION CU PANICO

Gobierno no mester reacciona cu panico, manera cu a pasa den e caso di e-steps, (unda cu a dicidi pa den forma ‘per direct’ stop tur e-stepnan riba caminda publico), pero tampoco por sigui actua manera si nada a pasa. Ya na 2024, gobierno mes a anuncia e politica pa regula y reduci uso di ATV y UTV, precisamente pa limita daño na naturalesa, molester pa residentenan y riesgo pa usuario. Te hasta a papia di un ruta alternativa pa e aparatonan aki, pa yuda mitiga e daño ambiental cu e aparatonan aki por haci. 

RESPONSABILIDAD DEN TRES PARTI

E punto central ta esaki: responsabilidad ta parti den tres parti.

Gobierno tin responsabilidad pa pone regla cla, controla caminda por core, unda no por core, kico tipo di vehiculo por wordo gehuurd, edad minimo, licencia, seguro, casco, velocidad maximo, guia obligatorio, y sancion real. Si gobierno sa cu e actividad ta riesgoso y ta afecta naturalesa, pero no ta controla suficiente, anto gobierno no por laba man despues di un tragedia.

Companianan cu ta huur UTV y ATV tampoco no por limita nan responsabilidad na: “cliente a firma, pues ta su problema”. Nan ta bende un aventura cu riesgo. Pesey nan mester proba cu nan a duna instruccion serio, equipamento bon, guia responsabel, ruta legal, limite di velocidad, briefing di seguridad, y control durante e tour. Si un cliente haci locura, claro cu no por culpa e compania automaticamente. Pero si e sistema ta demasiado facil, demasiado rapido y demasiado liber, e negoshi tambe tin un parti di responsabilidad.

Usuario tambe tin responsabilidad. Un turista of local cu huur un UTV mester compronde cu e no ta un co’i hunga. Si e core duro, sali for di ruta, ignora instruccion, of busca adrenalina sin control, e ta pone su mes y otro den peliger. Pero e responsabilidad individual no ta elimina e responsabilidad di gobierno y compania pa preveni cu hende sin experiencia haya un vehiculo potente y bay den terreno peligroso casi sin barièra.

E comparacion cu huur auto tin limite. Ora bo huur un auto, bo mester licencia, firma contrato, tin seguro, tin nummerplaat, tin regla di trafico cla, y tin polis cu por controla. Cu e-step, hopi biaha e persona ta djis pasa su credit card y ta core bay. Cu UTV y ATV, e riesgo ta otro: velocidad, terreno bruto, falta di experiencia, naturalesa vulnerabel, y turista cu no conoce Aruba. E ta un diferente tipo di actividad, y pesey mester diferente tipo di control.

E miho paso no ta necesariamente prohibicion total inmediato. Pero si mester un moratorium parcial y urgente: no permiti tournan den zonanan vulnerabel, no permiti ruta peligroso te ora cu tin evaluacion tecnico, y suspende licencia di operador cu no cumpli cu norma di seguridad. Paralelamente, gobierno mester publica un regulacion nobo cu deadline corto.

E regulacion ey mester inclui: ruta oficial obligatorio, velocidad maximo, GPS tracking riba tur UTV/ATV di huur, casco obligatorio, briefing firma y registra, seguro obligatorio, guia certifica, inspeccion tecnico di vehiculo, limite riba cantidad di vehiculo pa tour, y multa serio pa compania y usuario. Tambe mester tin zonanan completamente cera pa proteha naturalesa.

E pregunta cu si un morto ta suficiente, no tin contesta facil. Pa hopi esaki ta E momento pa pone un PARO completo mesora na e aparatonan aki. Pa otronan, Un morto si mester ta suficiente pa cambia politica. No necesariamente pa mata un sector completo, pero si pa stop e forma actual si e forma actual no por garantisa seguridad y proteccion di Aruba.

Aruba no mester scoge entre turismo y seguridad. Aruba mester scoge un turismo cu no ta destrui su naturalesa, no ta pone e turista den peligro innecesario, y no ta laga gobierno core tras di tragedia cu medida improvisa. E caso aki no ta solamente un accidente. E ta un señal. Awor gobierno mester demostra cu regulacion ta mas cu palabra riba papel. Y mi ta laga bo cu un comentario cu mi a lesa di un turista cu ta frecuenta Aruba. E ta bisa cu e la huur un UTV na Aruba, y debi na su propio locura, a accidenta, y mester a haya tratamento urgente medico. E la mustra cu ta SU responsabilidad y cu NO por culpa e compania cu a huur e, e aparato. De echo, e ta elogia e compania cu a huur e e aparato, ya cu nan a haci lo maximo pa yud’e despues cu e la haya e accidente. E punto ta, cada persona ta keda responsabel pa nan accion. Y cu tin turista cu ta biba un bida ‘sobrenatural’ den un pais ajeno, ta su responsabilidad. Pero, si, e compania cu ta ofrece e aparatonan, kizas mester ta mas prudente. Ban wak, con gobierno lo actua awor.