A.T.A. ta inverti den futuro culinario di Aruba cu experiencia internacional pa studiantenan na Peru

ORANJESTAD – Aruba Tourism Authority (A.T.A.) a manda cinco studiante sobresaliente di Colegio EPI rumbo pa Lima, Peru, como parti di su Culinary Education Plan cu ta enfoca riba fortalecemento di educacion culinario y futuro di sector turistico y hospitalidad di Aruba.

E iniciativa ta forma parti di un esfuerzo mas grandi di A.T.A. pa desaroya talento local y prepara un nobo generacion di profesionalnan pa industria culinario, cu ta considera un pilar importante den experiencia turistico di Aruba.

Durante e experiencia internacional, e studiantenan lo aprende tocante cushina tradicional peruano, tecnicanan culinario y sistema educativo gastronomico di Peru, cu meta di trece conocemento y inspiracion bek pa Aruba.

CEO di A.T.A., Ronella Croes, a enfatisa cu inversion den hubentud y talento local ta esencial pa futuro di turismo na Aruba, y cu e experiencia internacional lo contribui na crecimiento continuo di sector culinario y bienestar di comunidad.